Upalungaarsimanermut pisortaq uuliakoorneq pillugu: Pinngortitamut uumasunullu ulorianarnersoq nalilersorneqassaaq
Kulusummi Mittarfeqarfimmi sulisut tallimanngormat ullaakkut dieselolie 120.000 literi sumut tamaannga kuussimasoq siumorpaat.
Tamanna Mittarfeqarfimmi sulisup tankimiit tankimut nuussinerani pisoq, Mittarfeqarfiit ingerlatsinermut pisortaat, Niels Grosen KNR-imut taama ilisimatitsivoq.
- Tankimiit nuussisoqarnerani maqitsineq utsersulersimavoq, tamannalu arajutsineqarluni.
Qanoq ililluni dieselolie taama annertutigisoq arajutsineqarsinnaagami?
- Qanoq ililluni taama utsersortoqartigisinnaanera paasiniarlugu atortugut misissuleruttorpagut. Misissuinermi paasisaqariarutta atortugut qanoq aaqqiivigisinnaanerigut paasissavarput, Niels Grosen oqarpoq.
AAMMA ATUARUK Uuliakuungaatsiartoqartoq: 120.000 literi tankimit aniasoq
Mittarfeqarfimmi uuliakoortoqarnerani tunngatillugu sulisup ataatsip kukkuluttorneratigut pisinnaanera ingerlatsinermut pisortap mattutinngilaa.
- Taama pisoqarsinnaanera qularutissaanngilaq, kisianni atortut misissorneqarput qanorpiaq pisoqarsimanera qulakkeerniarlugu, Niels Grosen oqarpoq.
Imaq uumasullu eqqorneqaratarsinnaaasut
Kulusuup mittarfeqarfiani dieseloliamit utsersortoqarnerani olia tatsimut imaanullu siaruaappoq.
Upalungaarsimasut sumiiffimmilu qatserisartut suligasuarneratigut uulia tatsimut kuuttoq piipallanneqartoq, Kommuneqarfik Sermersuumi upalungaarsimanermut pisortaq, Jes Damgaard Andersen oqarpoq.
- Tatsit sikusimapput taamaalilluni dieselolie sikusimasumiittoq milluaammik atortulerluta 40.000 literi milluarsinnaasimavarput.
- Ajoraluartumik tamaat milluaammik katersorneqarsinnaasimanngilaq, uuliakoortoqarnera suli paasineqannginnerani imaanut ilaa kuussimagami, taanna oqarpoq.
Dieselolie sumut tamaannga kuuttoq annertummat oqartussanik nalilersorneqassasoq, Kommuneqarfik Sermersuumi upalungaarsimanermut pisortap ilanngullugu KNR-imut oqaluttuarpoq.
- Imaanut aamma kuuttoqarpoq, imaanut kuunnikoq milluarneqarsinnaasimanngilaq. Immamut uumasunullu qanoq sunniuteqarpa? Tamatuma kingorna arlaannik susoqassava? Tassa tamakku oqartussanit misisssuiffigineqarlutillu nalilersorneqassapput.
