Marc Fussing Rosbach qarasaasiami spilliliorpoq – illit aamma taamaaliorsinnaavutit

Isiginnaagassiortartoq, Marc Fussing Rosbach qarasaasiami spilliliorpoq, tassani nunatta pinngortitaanik misigisassarsiortoqarsinnaavoq. Taassuma spilliliornermut atortoq akeqanngitsoq atorpaa, allallu aamma spilliliornissaannut innersuussutigaa, namminermi tiguartissimavoq.

Allattoq Miki Fleischer

aggustip 06-at 2025 07:28

Nutserisoq Connie Fontain

Marc Fussing Rosbachip nunatta pinngortitaanik tunngaveqarluni qarasaasiami spilliliuleruttorpoq, piviusorsiorpalaangaarmallu spillertoq qaqqamiittuusisinnaasassalluni.

- Misigisassarsiornissamut tunngasoq, angalaarnermut, nunakkut pisuttuarluni. Nuna ammaannartoq, nunatsinniittoq. Assigiinngitsunik misigisassaqarluni, nassaassaqarlunilu katersuisinnaalluni, taanna oqarpoq.

Isiginnaagassiortartoq, ilaatigut isiginnaagassiani 'Akornatsinniittut - Tarratta Nunaani' nanginneranilu 'Akornatsinniittut - Kiinappalik' ilitsersuisuusoq aammattaaq Malik Kleist peqatigalugu isiginnaagassiorsimasutut ilisimaneqartoq spilliliornermut atortorissaarut internettimut attaveqartunit tamanit atorneqarsinnaasoq akeqanngitsoq, Unreal Enginemik taaguuteqartoq atorlugu spilliliuleruttorpoq.

Atortorissaarutillu periarfissaalluarnera pissutigalugu Marc Fussing Rosbachip qarasaasiatigut spilliliornissamut soqutiginnittut namminneq misiliinissaannik kaammattuuteqarfigai.

- Siunnersuutigikutsoorsinnaavara, arlaat soqutiginnippat, taamatut nunarsuamik nammineq sanasinnaalluni nuannertorujussuugami.

Nunarsuaq ammasoq

29-inik ukiulik soqutisaqartoq open-world-imik tassa nunarsuarmik ammasumik spilliliuleruttorpoq. Tassa imaappoq spillimi inuttaasoq ammaannartumiissaaq qaqqallu isigisinnaassallugit. Spilliliaani angalaffigerusutat misissuiffigerusutallu orninneqarsinnaassapput. Spillertut qanorpiaq iliortassanersut suli aalajangivinngilaa, spillillu qaqugu naammassinissaa ullulerneqarnani. Taamaammat suli piffissaqarluarnerarpoq.

- Nammineerlunga nunarput taamannak spillinngorlugu misigerusuttarlugu. Inuusuttuullungali sinnattoriuaannarnikuuara. ’Fallout’, ’Legend of Zelda: Breath of the Wild’, ’Skyrim’ taakku isumassarsiorfigalugit spilliliannut atorpakka.

Toqqaannanngitsumik oqaluttuartaqassasoq

Spillimi kisimiilluni nunatta pinngortitaa angalaarfigineqarluni sumiiffinnillu nassaarnermi toqqaannanngitsumik susoqarsimanera paasineqarsinnaassaaq.

- Illuaqqanukaraanni taakkunani najugaqarnikut nipai tusaasinnaasarlugit, soorlu illarpaluttut, oqaluppaluttut, taamaasilluni illuaqqap oqaluttuassartaaraa misigisinnaassallugu, imatut takunngikkaluarlugit kisianni tusaalaarsinnaallugit, soorlu meeqqat nuannisarpaluttut imaluunniit aappariit oqaluuppaluttut, taanna oqarpoq.

Paasissutissat allagaaqqaniittut najoqqutaralugit paasisassarsiorfissanik nalorsitsaaruteqassaaq.

- Pisatanik tingooraasinnavoq, allagaaqqanik atuagassaqartarumaarpoq. Ilaatigut nalorsitsaarutinik suliassaaraqartarumaarpoq, soorlu una illuaraq parnaaqqavoq, matuersaataa peqanngilaq.

- Allaqasoqartarumaarpoq arlaannik ’hint-iaqqanik’ (paasissutissaaqqanik aaqq.), soorlu ”uani toqqortaateqarpugut”, taanna toqqortaq nassaarigaanni una illuaraq alla ammarsinnaanngussaaq. Tamakkuaqqat, Marc Fussing Rosbach oqarpoq.

Spillip nunatsinnik tunngaveqarnera pissutigalugu nunatsinni spillertartunit tigulluarneqarnissaa, Marc Fussing Rosbachip neriuutigaa.

- Neriuppunga spillertup nuannersutut ilaatigut aamma attortinnarsinnaasutut misigiumaaraa. Makku nunatsinnut tunngasut assigiinngitsut soorlu anersaartorfissaq imaluunniit isikkiviit kusanartorujuit misiginissaat naleqartorujuugamik.

Taassuma spilli ukiuni marlunni kingullerni suliaraa, spillilu naammassillunilu saqqummerpat taanna nunatsinni allat spilliliornissamut soqutiginnilernissaannut isumassarsisitsissasoq neriuutigaa.

- Imaallaat aamma nunatsinni spilliliortarnerit aallartissagaluarput. Oqaluttuarfissatut spilleq media pitsarujussuugami, Marc Fussing Rosbach oqarpoq.00:00:12

Marc Fussing Rosbachip spillip saqqummernissaa suli ullulinngilaa, piffissamili qaninnermi naammassisinnaassallugu takorloorpaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.