Politiit ullormut nalunaarutaat: Angut persuttarneqangaarsimasoq Nuummi Nuussuarmi inissiami siumorneqartoq

Politiit ulloq unnuarlu kingulleq ulapaarsimasut, pigaartut pisortaat Aputsiaq Hansen oqarpoq.

- Pisimasut amerlanersaat imigassartorsimanermut angerlarsimaffimmilu eqqissiviilliornermut tunngapput, suliamilu ataasiinnaanngitsumi meerartaqartoqarsimavoq, pigaartut pisortaat oqarpoq.

Angerlarsimaffimmi eqqissiviilliornerit ilaat ataasinngornermi unnukkut nalunaaqutaq arfineq-pingasunut qiteqquteqqammersoq Nuussuarmi inissiami pivoq. Politiit sumiiffimmut apuukkamik angut persuttarneqangaarsimasoq inissiamiittoq siumorpaat.

- Angut pisumut pasineqartoq politiinit tigusarineqarpoq, angummullu tunngatillugu siornatigut suliat ippassarlu pisup ilungersunarluinnarnera pissutigalugit angut ullumi kingusinnerusukkut sassartinneqassanersoq inatsisilerituut nalilersussavaat, Aputsiaq Hansen oqarpoq.

Pisimasoq pillugu pigaartut pisortaata oqaatigisinnaasatuaa tassaavoq inersimasut marluk pisumut peqataasimasut.

Sisimiuni Qaqortumilu aallarussinerit

Sisimiuni Qaqortumilu biilinik aallarussisoqarsimaneranik sinerissami pisimasut pillugit pigaartut pisortaat oqaluttuarpoq.

- Qaqortumi pisimasoq ullaaq arfineq-marlup qaangilaaraa pimmat suliaq pillugu suli ilisimasaqarpianngilagut.

- Nalunngilarpulli kina pinerluuteqarnersoq, sulilu misissuivugut, Aputsiaq Hansen oqarpoq.

Sisimiuni pisimasoq unnuaq nalunaaqutaq marlunut qiteqquteqqammersoq pivoq. Tassani biilit aallarunneqarput kingornalu aamma allat aallarunneqarlutik.

- Pinerluttut aallarussigamik matuersaat eqqortoq atorsimavaat, taamaattumik nuna tamakkerlugu innuttaasut matuersaatiminnik biiliminnut qimatsisassannginnerinik kajumissaarpakka, pigaartut pisortaat oqarpoq.

Unnuaq taanna kingusinnerusukkut Sisimiuni biilit aallarussat ajutoortut, biilinilli ingerlatsisoq qimaasinnaasimasoq, ajoqusertoqarsimanngitsorlu, Aputsiaq Hansen oqaluttuarpoq.

- Ullaaq mannalu politiit inuit pingasut tigusaraat, taakkulu aallarussinernut marlunnut pisuusimassangatinneqarput, taanna oqarpoq.

Aavarfik arlalinnik nalunaaruteqarfiusoq

Aammattaaq arlalinnit ilaquttaminnik piniariarsimasunik ernummateqartunit politiit nalunaarfigineqarsimasut, pigaartut pisortaat oqarpoq.

Tassunga atatillugu ernumasoqalinnginnissaa pillugu piniariartoqartinnagu pilersaarutit pillugit tamanik, aamma pilersaaruteqqaanik pilersaarutillu siulliit iluatsinngippata pilersaarutit allat suunerinik, qanigisat ilisimatinneqartassasut, taanna kajumissaarivoq.