Qajaq: Karoline Nielsen VM-imi arfernattut inissippoq

22-nik ukiulik Karoline Nielsen Silkeborgip tasiini maanna sungiusaqqilereerpoq iluatsilluartumik VM-imi peqataareerluni. Tassani U-23-ni kisermaattarissami 200 meterimut unammeqataavoq.

Nunarsuarmi pissartanngorniunneq juulip naanerani Portugalimi pivoq inuusuttuni ukioqatigiit assigiinngitsut unammeriaatsini arlariinni unammimmata.

Naak ujaminnanngikkaluarluni taamaattoq Karoline Nielsen naammagisimaarinnilluarpoq ukioqatimini nunarsuarmi arfernattut inissikkami.

- Assut ingerlalluarpunga pingaartumillu semifinalemi unamminera assorsuaq naammagisimaarpara. Tassani paarluaqaanga. Finaleli taama iluatsilluartiginngilaq, taamaakkaluartoq angusarissaartutut misigisimavunga, Karoline Nielsen oqarpoq.

Semifinalemi ajugaasoq

Tassami pikkorilluinnartut akornanni semfinalemi ajugaasuuvoq assigiinngitsut iluatsilluaramigit.

- Unammilluarpunga aallarnerpullu aamma iluatsilluariarlugu eqqarsarluarlunga, Karoline Nielsen oqarpoq.

Tamannarpiarli finalemi iluatsinngilaq.

- Tassani sunerpunga. Unammilluarpallaanngilaq. Pisarnittut ingerlanngilanga. Taamaattormi arfernattut inissinnera ajunngeqaaq, Karoline Nielsen oqarpoq.

VM-riartut aallarnissaannut sapaatip akunnerinnanngortoq toqqagaalluni paasivaa. Tamanna pivoq iluatsilluartumik Europami pissartanngorniuttuni peqataareerluni tassanilu pikkorinnerit tallimaattut inissilluni.

Taanna tassaavoq ukiuni sisamanngortuni nunani tamalaani unammeeqataanerisa siullersaat maannalu nunarsuarmi pissartanngorniuttuni peqataareerluni sungiusarluaannarnissamut piumassuseqarluarpoq.

- Maanna Danmarkimi pissartanngorniuteqataalerpunga sulili qasujaannerusariaqarlunga. Neriuppunga aappaagu peqataaqqissinnaajumaarlunga aammalu timikkut sungiusarsimassusera aappaagumut tunngavilerluarsinnaassallugu neriuppunga, Karoline Nielsen oqarpoq.