Ataataq erninilu arsaannermi pissartanngoqatigiittut: Oqaasertaleruminaappoq
Unammineq naamassisoq nalunaarlugu dommeri siggarniariartoq arsartut marluk arpaannaq imminnut ornissinnarlutik pakkutaarput.
Tassaapput B-67-ip målmandia Kasper Gundel Collin assersuisorlu Angutivik Gundel Collin, Nunatsinni pissartanngorniunnermi finalemi 2-1-mik ajugaallutik nuannaartut.
Sapaammi finalemi unammivaat IT-79 Nuummeersoq finalemut ingerlaarnerminni ajorsartinneqanngivissut. Finaleli naammassimmat ataataq erneralu B-67-meersut ajugaasuullutik pakkutaarput seqinnarissuaq avatangiiseralugu.
- Qanoq oqassalluni nalunarpoq. Sukataarnerpassuit ilungersornerillu aqqusaarnikuuagut. Taamaattumik ajugaanerput assorujussuaq nuannerpoq, Kasper Collin Gundel maanna 40-nik ukioqartoq KNR-mut oqarpoq.
Misigisaq ernerata aamma pikkusuffigaa.
- Soorunami assorujussuaq nuannaarutigiviara ataataga arsaqatigisinnaagakku. Mikigallaramali arsaqatigerusuttuaannarnikuuara, Angutivik Gundel Collin maanna anguterujussuusoq oqarpoq.
Tupatsitaapput
Finale aallartisimatsiaannartoq IT-79 1-0- mut siuarpoq tamannalu attappaat unamminerup naammassinissaanut minutsit 20-iinnanngornissaata tungaanut naligiikkallalissutaasumi B-67 isertitsimmat.
- Tupatsitaanerput qaangerniaqqaalaarparput aammalu utaqqikatannaversaarnissamik isumaqatigiissut inissinniaqqaarlugu, Kasper Gundel Collin oqarpoq.
Unammineq tamaat B-67 arsamik tigumminerujussuuvoq unamminerlu naammassingajalersoq aatsaat ajugaassutaasumik isertitsillutik.
Kasper Gundel Colling aamma Angutivik Gundel Collin suleqatigeeqqissaartuupput assersuinermi Angutivik qitiusumiimmat angutaata målit paarigai.
- Immitsinnut nalunngereerpugut taamaattoq suleqatigiinnerput pitsaanerulersinniarlugu piffissaq atornikuuvarput. Oqaloqatigiilluartarput suleqatigiilluarlutalu, Angutivik Gundel Collin oqarpoq.
Taamatut suleqatigiinneq eqqarsaqqissaarnissamik piumasaqarfiuvoq eqqarsaatit allat tassani inissaqarpallaaratik. Taamaattumik ataataaneq ernerunerlu unammineq naammassillugu sigarnissaata tungaanut puigorneqarallartarpoq.
- Aap, angerlarsimaffitsinniit anigaangatta tamanna unikkallartarpoq. Ataataaneq ernerunerlu oqaasiinnanngortarput iligiilerlutalu, Kasper Gundel Collin oqarpoq.
Bronzennanniunnermi G-44 Qeqertarsuarmeersoq ajugaavoq Nagtoralik Paamiuneersoq ajugaaffigalugu.
