Kinguaariit nutaat pallitsaaliueqataassapput

Ittoqqortoormiini nannunik pallitsaaliuisut aallartinnerannit ukiut qulit qaangiussimalerput. Nannunillumi illoqarfimmit pallitsaaliorneqartarnerat illoqarfimmiunut toqqissisimatitsissutaasoq, Ittoqqortoormeermiut ilaat oqarpoq.
Nannut illoqarfimmut qaninnguunnginnissaat anguniarlugu pallitsaaliuisut piareersimasarput. Assi © : WWF Kalaallit Nunaat
aggustip 02-at 2025 10:00

Ukiut qulit matuma siorna WWF Kalaallit Nunaat suliniuteqalerpoq taallugu Nannunut upalungaarsimasut. Nannunik pallitsaaliuisut nannut illoqarfimmut qallinnginnissaat pinaveersaartittussaavaat. Suliniutip siunertaraa Ittoqqortoormiini innuttaasut 360-t missaanniittut toqqissillutik illoqarfimminni angalaartarnissaat. Innuttaasut isumaqarput, assersuutigalugu meeqqat ullaakkut toqqissillutik atuariartortarnissaannut nannunik pallitsaaliuisut toqqissimatitseqataasut. Ittoqqortoormiit eqqaat nanoqarfissuuvoq. Ukiup qanoq ilinera apeqqutaatinnagu nannut illoqarfimmut qaninngoorsinnaasarput, tamannalu innuttaasunut navianartumik kinguneqarsinnaalluni.  

Pallitsaaliusut inuusunnerit amerlanerulissapput

Ittoqqortoormiinut tikeraarnermi nannunik pallitsaaliuisut amerlinissaat pisariaqalersimasoq, Malene Lynge , WWF Kalaallit Nunaanni - pisortaasoq oqarpoq. 

-Upalungaarsimasuutitagut ukioqqortusinerat upalungaarsimasuutitaqarsinnaanissarput angujumallugu ilaqqinnissaat aamma inuusunnerusunik amerlanerusunillu peqalernissarput maani siunertaralugu taamaasiorpugut, Malene Lynge taama nassuiaavoq. 

Pallitsaaliuisut ukiuni qulini atuunnerminni nannut katillugit 130-t tungaannut illoqarfimmut appakaatinnginnissaat pallitsaaliorsimavaat. Taakkunannga nannut qulit missaanniittut inuunermik ulorianartorsiortitsisimammata toquinnartariaqarsimasut, ukiuni qulini pallitsaaliuinermik suleqataasup Erling Madsenip, nannunik pallitsaaliuisut aallartimmatali suleqataasoq oqarpoq.  

Toqqissisimatitsipput

Leo Brønlund, Ittoqqortoormiini najugaqartoq, Malene Lynge-tulli isumaqarpoq, nannanik pallitsaaliuisut sulinerat illoqarfimmiunut toqqissisimatitsisartoq. 

-Ullaaralaakkut suliartortussanut toqqissisimatitsisarput, nannunimmi pallitsaaliuisut nalunaaqutaq arfininngunngitsorluunniit aallartittarput. 

Pallitsaaliuisut sulinerat Leo Brønlundip pissanganartuunerarpaa. Taamaammat suleqataarusulluni qinnuteqarsimavoq.

-Suliffik qinnuteqarfigaara, nunaqqatikka imaluunniit maani innuttaasut toqqissisimatikkusullugit, oqarpoq. 

Nannunik pallitsaaliuisussatut sulilissagaanni piumasaqaatit ilagaat Ittoqqortoormiit eqqaata ilisimasaqarfiginissaa, pinngortitami atuilluarsinnaaneq aamma allat peqatigalugit. 

Leo Brønlund pallitsaaliueqataasussatut sulilissaaq, sulininilu meeqqat atuartut atualerpata aallartissavaa, ukiullu sinnera sulissalluni.