Múte B. Egede: Aningaasaqarnermi unammillernartoq ukiuni arlalinni eqqartorsimasarput massakkut nalaappasipparput

Pisortat aningaasartuutaat isertitaannit amerlanerulereersinnaapput. 

Taamaammat aaqqissuusseqqinnerit maanna pisariaqarput, pisortanilu sipaarniuteqarujussuarnissaq naalakkersuisut aallarniutigissavaat.

Piffissamili qaninnermi pisariaqartut aamma suliassaapput. Nunatta Karsia 250 millionit koruuninik siorna amigartooruteqarpoq, ukioq mannalu 350 millionit koruuninik amigartooruteqassangatinneqarluni.

Tassalu ukiut marluk ingerlanerini 600 millionit koruuninik amigartoortussaarpasippoq.

Taakkulu aningaasanut inatsimmi matussuserneqartussaapput.

- Unammillernangaatsiarpoq. Taamaalillunilu aamma iliuusaasinnaasut assigiinngitsut takorloorneqarsinnaasut aammalu alloriarfigineqarsinnaasunut alloriarnissap taama sukkatigisumik pisinnaanngineranut pilersitsivoq. Ima paasillugu, massakkoqqissaaq qulakkeerniagarput, oqimaaqatigiissumik nunatta aningaasaqarnera siunissamut aamma patajaatsuunissaanik qulakkeerinnittussaq taanna alloriaqqaarfigivarput, Múte B. Egede oqarpoq.

Pisortat aningaasartuutaat isertitaannit amerlanerulissasut aningaasaqarnermik suliallit qangalili oqaatigisarpaat.

Taamaattoqalereersimanissaanullu takussutissaqarpoq.

- Ukioq manna aningaasanut inatsisissamut suliaqarnermi unammillernartoq taanna ukiuni arlalinni eqqartorsimasarput massakkut nalaappasipparput, Múte B. Egede oqarpoq.

Annermik peruluffiunngitsoq, Aningaasaqarnermut Siunnersuisoqatigiit siulittaasuata, Torben M. Andersenip KNR-imut siusinnerusukkut oqaatigaa. Sulisitsisut pisortaata, Christian Kjeldsenip, politikerit pisortat aningaasaqarnerata ajorluinnannginnerani naggataatigut iliuuseqarnissaat ilimagaa.

Erik Jensen akissuteqaqqusisoq

Annernilli aaqqissuussisoqartariaqarpoq. Aamma aningaasaqarnermut naalakkersuisuusimasoq Siumumeersoq Erik Jensen naalakkersuisut Attassiinnarnissamut Ineriartortitsinissamullu pilersaarut 2023 aaqqissuusseqqinnissamut siunnersuutinik imaqartoq malinneraat pillugu akissutissarsiorpoq.

Soraarnerussutisiaqarnissamut ukiut qaffaanissamit pisortat aaqqissuussaanerannik allanngortiterinermut pilersaarummi siunnersuutaapput. Pilersaarummi allaqqasut naapertorlugit, aaqqissuusseqqinnermut siunnersuutit tamarmik atuutsinneqalissappata, pisortat ukiut qulikkaat tullianni amigartooruteqartalissapput, ukullu 20-t missaat qaangiuppata sinneqartooqqittalerlutik.

Aaqqissuusseqqittoqanngippalli, ukiuni qulikkaani matumani amigartooruteqartalissapput, ukiullu qulit missaat qaangiuppata milliardit koruuninik amigartooruteqartalissallutik.

Aningaasallu taakku nunatsinnut ingerlatsipput.

Aaqqissuusseqqinnerit nanginneqassasut

Aaqqissuusseqqinnermulli suliat qinigaaffiup siuliani aallartinneqartut nanginneqassasut Múte B. Egedep paasissutissiissutigaa. Aamma taakku pilersaarummi siunnersuutigineqartut.

- Pisortat allaffissornikkut ingerlatsinerata annertuumik sipaarniarfigineqarnissaa siullertut alloriarfigineqarpoq. Tulliitut aaqqissuusseqqinnerit suli pisariaqartitagut, alloriarfiusariaqartut piareersaasiorneqalerput. Ilaatigut pisortat aaqqissugaanerata aamma uagutsinnut tulluartunngorlugu inissinneqarnissaa suliassatta ilagisussaavaa, Múte B. Egede oqarpoq.

Qanoq sipaarniartoqarniarnersoq aningaasanut inatsisissatut siunnersuummi qaammammi matumani saqqummiunneqartussami takuneqarsinnaajumaartoq, taanna oqarpoq.

Aamma ilinniartitaanermi, soraarnerussutisiaqarnermi akileraartarnermilu aaqqissuusseqqinnernik suliaqarlutik paasissutissiissutigaa. Taakkuali saqqummiuteriaannanngorlugit suli piareeqqanngimmata, annerusumik oqaaseqarfigisinnaanngilai.

Malugineqarsinnaanissaalli ilimasaarutigigaluarlugu innuttaasut ulluinnarni atugaannik innarliinaveersaarlutik ereqqissaatigaa. Maluginngitsoorneqarnissaali mattutinngilaa.

- Aaqqissuusseqqinnerit suulluunniit sungiusimasatsinninngaanniit allannguinissamik alloriarfiusarput. Taamaammat annerusumik minnerusumillu aamma malussarfigisarpagut. Taamaattorli ulluinnarni innuttaasut inuuniarnerannut ajorseriaataannginnissaannik aaqqissuusseqqinnerit qinigaaffimmi uani suliarineqartussat tamaasa siunnerfeqarfigalugit toqqammavilerniarpagut, taanna oqarpoq.