Naalakkersuisut aaqqissuusseqqinnerup sukkassusaa illersoraat

Aningaasaqarnermut naalakkersuisoq Aqqaluaq B. Egedep (Inuit Ataqatigiit) Qanoruumi ilaatigut taama akissuteqarpoq.

Tassani Aqqaluaq B. Egedep Aningaasaqarnermut Siunnersuisoqatigiit nunap aningaasaqarnerani ajornartorsiutini tunngaviusuni aaqqiissutissaqannginnerat pillugu Naalakkersuisunut isornartorsiutaannut akissuteqartinneqarpoq.

- Ajornartoorfimmi aaqqiissutissanik nassaartariaqaleriataaraanni, aningaasartuutissanik annertuumik appaariasariaqalerneq akileraarutitigulluunniit annertuumik qaffaasarialeriataartoqarsinnaasoq, sisamanngornermi Aningaasaqarnermut Siunnersuisoqatigiit siulittaasuat Torben M. Andersen oqarpoq.

Kalaallit Nunaata ukiuni aggersuni amigartooruteqarsinnaanerujussua pillugu Naalakkersuisut aaqqissuusseqqissimannginnerat Aningaasaqarnermut Siunnersuisoqatigiit assut aarlerigivaat.

Naalakkersuisut aaqqiissutissanik nassaanngippata Namminersorlutik Oqartussat ukiut 15-it qaangiuppata én milliard koruuninik  assersuutigalugu peqqinnissaqarfimmut ilinniartitaanermulluunniit amigaateqalissapput.

AAMMA ATUARUK Nunatta aningaasaqarnera ajornartorsiuteqaleriartortoq

Naalakkersuisunut ilaasortap Aqqaluaq B. Egedep sisamanngornermi Qanoruumi ajornartorsiutip aaqqiiffiginissaa neriorsuutigaa:

- Pisortaninngaanniit isumalluuteqarluni utoqqalinersiaqarneq qimallugu nammineq katersaqarsinnaatitaaneq eqqunniarneqartoq, Aqqaluaq B. Egede ilaatigut oqarpoq.

Politikerittaaq eqqaavaat, akileraariaatsip nutaap, aamma akileraartarnermi ilanngaatip sulisunut atuuttup nunap aningaasaqarnera siunissami ataqatigiinnerusumik ingerlatilerumaaraat.

Illuatungiliuttut siulittaasuat Randi Vestergaard Evaldsen isumaqarpoq aaqqissuusseqqinnissap sulissutigineqarnera sukkanerusariaqartoq. Tamatumunngalu Aqqaluaq B. Egede akerliunngilaq:

- Sukkanerusumik aammalu periarfissanik pitsaanerusunik ujaaseqatigiinneq inuiaqatigiittut pisariaqartipparput, taakkuuppullu massakkut aningaasaqarnermi Naalakkersuisoqarfimmi suliarisavut, Aqqaluaq B. Egede naggasiivoq

AAMMA ATUARUK Siunnersuisooqatigiit sakkortuumik isornartorsiuipput