Nunatta aningaasaqarnera ajornartorsiuteqaleriartortoq

Kalaallit Nunaata aningaasaqarnera Naalakkersuisunit aaqqissuuteqqinneqajaanngippat, aaqqissuusseqqinneq piviusunngulerpat sakkortunaarneqarsinnaavoq.
Allattoq Thomas Munk Veirum
septembarip 14-at 2017 16:01
Nutserisoq Erna Lynge

Tamatuma kingunerisinnaavaa peqqinnissaqarfiup ilinniartitaanerullunniit annertuumik ileqqaarfigisariaqalernerat.

Nunatta aningaasaqarnera pillugu Aningaasaqarnermut Siunnersuisoqatigiit ukiumoortumik pingaarnertut taama nalunaaruteqaqqipput.

- Aningaasaqarneq maanna aaqqiiviginnikkaanni aningaasartuutit isertitanit amerlanerulissapput. Aningaasaqarnermut Siunnersuisoqatigiit siulittaasuat Torben M. Andersen oqarpoq.

Taanna aamma Aarhusip Universitetiani naalagaaffiit aningaasaqarnerinut professoriuvoq.

Ukioqqortunerusoqarnera aningaasartuuteqarfiunerusoq

Inuiaqatigiinni nutaarsiassamit nuannersumit ajornartorsiut pinngorpoq - inuunertunerulersimavugut - tamannali aamma aningaasartuuteqarnerulernermik kinguneqarpoq.

- Utoqqaat amerligaluttuinnartut soraarnerussuteqartalissapput, utoqqalinerullu nassatarisarpaa napparsimmaviliakulanerit. Taamaattumik innuttaasut utoqqalinerusalernerat aningaasartuutit amerlinerannik kinguneqassaaq, isertitalli qaffariaratik, siulittaasoq taama oqarpoq.

Annilaarnarnerarpaa ukiuni aggersuni qulini aningaasaqarnermi amigartoorutissanut Naalakkersuisut eqqanaarisimannginnerat.

- Kinguaariit tullinnguuttut politikerinngortussallu nanertuutinngortussanik qimatsivigineqassapput.

Torben M. Andersenip erseqqissaatigaa maannakkut aningaasaqarnitta pitsaasup ajornartorsiut aaqqinnavianngikkaa.

Aningaasaqarnermut inatsisissatut siunnersuummi Naalakkersuisut suliniutit assigiinngitsut erseqqissaatigaat - soorlu napatitsinermut siuariartortitsinermullu pilersaarusiornertigut ajornartorsiut aaqqiivigineqartussanngorlugu.

Tassanimi Naalakkersuisut pisortat suliffeqarfiini annertuumik pisariillisaanermikkut atorfiit 900-it atorunnaarsinniarpaat.

- Aningaasaqarnikkut amigartoorutinik matussusiinnginnermi alloriarneq angisooq, taanna oqarpoq nangillunilu:

- Arlaatigut annaassiniarnissaq pisariaqalissaaq, annertuumik ileqqaartariaqalerneq imaluunniit akileraarutit annertuumik qaffallugit, taanna naggasiivoq.

Aningaasaqarnermut Siunnersuisoqatigiit siunissamut aningaasaqarneq sammigaangamikku oqartussaaffiit Danmarkimiit tigusassat, namminersuleriataarnissarluunniit ilannguttanngilaat.

Naalakkersuisullu oqartussaaffinnik tiguseqqinniarunik aningaasat siunnersuisoqatigiit tikkuartugaasa avataatigut nassaarisariaqarpaat.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk