Erik Jensen naalakkersuisunut tatisisoq: Aaqqissuusseqqinnerit nuannarineqanngitsut akileraarutinilluunniit qaffaanerit

Naalakkersuisunngortunit ineriartortitsinissamik pilersaarut ingerlateqqinneqassanersoq Siumumit politikerip akissutissarserusuppaa. Allatut pisoqanngippat aningaasaqarnikkut ajornartorsiuteqartoqalersinnaasoraa – namminerli naammattumik iliuuseqarsimanngitsutut isornartorsiorneqarpoq.

Allattoq Markus Valentin

juulip 28-at 2025 15:00

Naqqiissut: Ilanngutassiami siusinnerusukkut naalakkersuisoqatigiit siuliini soraarnerussutisiassanut ileqqaartussaatitaaneq pillugu aaqqissuusseqqinneq atulersinneqartoq allassimavoq. Tamanna kukkuneruvoq, taamaammat ilanngutassiamit peerneqarpoq. KNR-ip kukkuneq ajuusaarutigaa.

Qinersisoqarnerani taaguussinerit kisinneqarmata Siumut oqaluttuarisaanermi aatsaat taama taaguunneqanngitsigisoq ersarippoq.

Erik Jensenip (S) qinersisartumi qimarrannerat partiip aalajangiinerminik qinersisartunut nassuiaalluartarsimannginneranik tunngavilersorpaa.

Erik Jensenip qinersisartuminnik taaguunneqannginnertik partiip aaqqissuusseqqinnernik nuannarineqanngitsunut atuutitsileqataasimanera aajangiinerillu qinersisartunut naammattumik nassuiaasimannginnertik tunngavilersuutigai.

Taamaattumik nunap karsia amigartooruteqarpoq

Nunatta karsiata amigartooruteqarnera siorna NunaGreenimut 400 millionit koruuninik aningaasaliisoqarsimaneranik Greenland Airportsimullu 100 millioninik tunniussisoqarneranik pissuteqarnerarlugu Naalakkersuisut namminneerlutik nassuiaatigaat.

Aalisarnermi 2023-mi rekordiliisoqarpoq. Raajaqassuserli – kiisalu kiilumut akit – pisassiissutillu apparput.

Tamatuma saniatigut sanaartornerup annikilliartornera pissutigalugu aningaasaqarneq siuariartornikinneruvoq. Tamanna ilaatigut Nuummi mittarfiup nutaap sanaartorneqarnerani sanaartukkat annertuup naammassinerannik pissuteqarpoq.

Peqqinnissamut naalakkersuisoqarfiup ukioq manna aningaasartuutai 2025-mi missingersuutigineqaqqaartunut sanilliullugit 65 millionit koruuninik qaffapput. Saniatigullu soraarnerussutisiaqartunut 59 millionit koruuninik atuisoqarneruvoq.

Namminersorlutik Oqartussat ingerlatseqatigiiffiinit nunatta karsianut 107 millionit koruuninik akiliinikinnerusoqarnissaa aamma naatsorsuutigineqarpoq. Tamanna aalisakkerinerup ineriartorneranik siuariartortoqarnerata apparneranik pissuteqarpoq.

Tamatuma saniatigut Namminersorlutik Oqartussat ingerlatseqatigiiffiutaat ataasiinnarluunniit aningaasaqarnikkut siumut ilimaginngisamik ajortorujussuarmik ingerlappat tamanna nunatta karsianut annertuumik kinguneqarsinnaasoq, ukiut sisamat matuma siorna Naalagaaffiup Aningaaserivissuata siulittuutigaa.

Taamaattumik Naalagaaffiup Aningaaserivissuata aamma Aningaasaqarnermut Siunnersuisoqatigiit aningaasaqarnermut annertuumik aaqqissuusseqqittoqarnissaa innersuussutigaat. Tamatumalu saniatigut naalakkersuisoqatigiissimasut piffissanut ilungersuaffiusunut atorneqartussanut sipaarniaratik aningaasanik amerlavallaartunik atuisimanerarlugit isornartorsiorpaat.

Allisiguk

Maanna Erik Jensen naalakkersuisut aaqqissuusseqqinnernik - nuannarineqanngikkaluartunik - ingerlatitseqqiinnarusunnersut paaserusullugu paragraf 37 atorlugu apeqquteqarpoq.

- Innuttaasut ikiliartorput, kinguaariillu utoqqaliartorlutik. Pilersaarut allanngortinneqassaguni tamanna aningaasaqarnikkut ajornartorsiutaangaatsialissaaq, pissutigalugu akileraarutit qaffanneqassammata. Taamaalilluta innuttaasut ilaat nunatsinnit aallartut annaassavagut. Tamanna pinngitsoortikkusuppara, taamaammat apeqquteqarnissaq pissusissamisoorsoraara.

Aamma atuarukErik Jensen: Naak nunatta karsia aningaasaqarnerlioraluartoq – aningaasat atornissaat eqqortuuvoq

Naalagaaffiup Aningaaserivissuata Aningaasaqarnermut Siunnersuisoqatigiillu siunissami atugarissaarnissamut akissaqarnissaq pillugu inatsisitigut allannguingaatsiartoqarnissaa pisariaqassasoq ukiuni qulikkaani aarlerisaarutigaat.

Politikerit pilersaarummik maanna atulersitsipput. Taannali ataannassanersoq apeqqutaaginnarpoq.

Akileraarutit qaffanneqarsinnaanngitsut

2023-p naanerani Attassiinnarnissamut Ineriartortitsinissamullu pilersaarut 2 atulersinneqarpoq. Tassani aaqqissuusseqqinnerit annertuut arlallit politikerit aallartissinnaasaat eqqaaneqarput.

Aalisarnermut inatsit aamma soraarnerussutisiaqarnissamut ileqqaartussaatitaanermut aaqqissuusseqqinneq ilaatigut tassanngaanneerput.

Aamma atuarukAningaasaqarnermut siunnersuisoqatigiit: Nunatta karsia tatineqartoq politikerillu sipaarnianngitsut

Partiit naalakkersuisoqatigiinnissamut isumaqatigiissutaanni naalakkersuisut aaqqissuusseqqinnernik ingerlatseqqiinnarniartut isumaqatigiissutigaat – Erik Jensenili qularutiginnippoq.

- Qineqqusaarnerup nalaani soraarnerussutisiassanik ileqqaartussaatitaanerup atorunnaarsinneqarnissaa allallu oqallisaapput. Taamaaliortoqaraluarpat nunatta aningaasaqarnerani aammali kommunini aningaasaqarnikkut piffissap sivikitsup piffissamilu ungasinnerusumi ajornartorsiortoqangaatsialissaaq.

Erik Jensen nammineerluni naalakkersuisut siuliini IA-p naalakkersuisoqatiginerani aningaasaqarnermut akileraarutinullu naalakkersuisuuvoq.

Taassuma naalakkersuisut ineriartortitsinissamut pilersaarut malinngikkunikku aaqqissuussinerillu ajornakusoortut ingerlateqqinngikkunikkit politikerit 2033-mi akileraarutinut qaffaangaatsiartariaqassasut oqaatigaa.

- Akileraarutit qanittukkut qaffanneqarnissaat pinngitsoortinniarlugu ineriartortitsinissamut pilersaarutip naalakkersuisunut apeqqutiginissaa pingaaruteqarpoq.

Soraarninngornissamut ukiut amerliartortut

Erik Jensenili aamma tikkuarneqarpoq.

Taassuma Aningaasaqarnermut Siunnersuisoqatigiinnit innersuussutit malinnagit aningaasanut inatsit nunatta karsianut amigartooruteqartitsisoq piffissanullu ilungersunarnerusunut aningaasaqarnikkut qulakkeerinninngitsoq naammassinikuugaa, KNR-ip siusinnerusukkut allaaseraa.

Aalajangiineq Erik Jensenip nunatsinni inuunermut Danmarkimut nuunnermit orniginartinneqarnerunissaanik tunngavilersorlugu illersorpaa.

Naalakkersuisoqatigiit isumaqatigiissutaanni aaqqissuusseqqinnerit

Partiit naalakkersuisoqatigiinnissamut isumaqatigiissumminni aaqqiivigineqartariaqartumik aningaasaqarnermi siunissami ajornartorsiuteqangaatsiarsinnaanera nassuerutigaat.

Naalakkersuisut aningaasanut inatsisissanik suliaqalerunik nunatta aningaasartuutaanik pingaarnersiukkanik sukannersumik aqutserusupput, aammali pisortanut aningaasaleerusullutik.

Akileraartarnermut aaqqissuusseqqinneq nutaaq aaqqissuussinerup 2026-mi annertunerulernissaa neriuutigalugu suliarineqarnera piaartumik aallarnisarneqassaaq.

Inuussutissarsiornermi akileraarutinut aaqqissuussineq atulersinneqassaaq. Ingerlatseqatigiiffiit akileraarutaat appartinneqassaaq, allaffissornerillu pisariaqanngitsut atorunnaarsinneqarlutik.

Immikkut ilisimasallit soraarnerussutisiaqarnermut suliassaqarfik misissussavaat, taamaaliornikkut aappaagumut aaqqissuusseqqinneq nutaaq politikikkut isumaqatigiissutigineqarsinnaassalluni.

Soraarnerussutisianut aaqqissuussinermi danskit kalaallillu tjenestemandit soraarnerussutisiaasa akornanni assigiinngissutsimik peersitsillunilu nammineq ileqqaarnissaq soqutiginarnerulissaaq – soraarnerussutisianullu ileqqaartussaatitaaneq isumaliutigineqaqqissaaq.

Allisiguk

Naallu aaqqissuusseqqinnerit atuutilersinneqarnissaat peqataaffigigaluaraa, Naalagaaffiup Aningaaserivissuata aamma Aningaasaqarnermut Siunnersuisoqatigiit politikerit angusaqarluarniarneq pillugu aaqqissuusseqqinnernik naammattunik atuutsitsilipallassimannginnerarlugit isornartorsiorpaat – akisussaaffik Erik Jensenimit akisussaaffigineqaqqammersoq.

Pilersaarutip malinneqarnissaanut aningaasaqarnermillu qulakkeerinissamut nammineq naammattumik iliuuseqarpit?

- Isumaqarpunga iliuuseqangaatsiarnikuullutalu assigiinngitsunik "nuannarineqanngitsunik" aalajangiinikuusugut. Naalakkersuisut siuliini annertuunik aalajangiissuteqarpugut, aaqqissuusseqqinnerpaaluillu naammassisassat suli arlaqarput.

Ineriartortitsinissamut pilersaarut aaqqissuusseqqinnernik partiit assigiinngitsut qinersisartuinit nuannarineqarnavianngitsunik imaqarpoq. Aaqqissuusseqqinnernik nuannarineqanngitsunik, qinersisartussinnut assersuutigalugu soraarninngortarnermut ukiunik qaffaanikkut atuutsitsilernissamut Siumut piareersimava?

- Tamanna partiimi suli oqaluuserinngilarput, annerusumilli artukkerneqarnani sivisunerusumik sulinissamut kajumissuseqalersitsinissamut periusissiamik pilersitserusuppugut, taanna oqarpoq, nangillunilu:

- Soorunami pissutsit assigiinngitsut misissorluaqqaassavagut. Soraarninngornissamut ukiut qaffanngikkaluarlugit atortorissaarutit suut atorlugit amerlanerusunik suliffissaqartitsiniarneq misissussavarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.