Nittartakkat nunatsinneersut saassunneqartut

Ilanngutassiaq Naalakkersuisut tusagassiuutinut nalunaarutaanniit nutarterneqarpoq

Kalaallit nittartagaat internetikkut – DDoS-imik saassussinernik taaneqartartunik, maannakkorpiaq saassunneqarput.

Sillimaniarnermut Aqutsisoqarfik Ritzauimut taama paasissutissiivoq.

- Pisut malinnaaffigilluarpagut aamma Danmarkimi Kalaallit Nunaannilu oqartussaasut susassarinnittut saassussinerit pillugit oqaloqatigiuarpagut, nakkutilliisoqarfik allakkatigut oqaaseqarpoq.

KNR-ip Kommune Kujalliup nittartagaata attaveeruteqqanera oqaatigisinnaavaa. Tamatuma saniatigut Kommuneqarfik Sermersuup nittartagaani ’Bad Gateway’-imik ullumi siusinnerusukkut nuisoqartarpoq.

DDoS-imik saassussisoqartillugu, nittartakkat internetikkulluunniit attaveqaatit artukkerniarsarineqalersarput, nittartakkat ajoquteqalerlutik iserfigineqarsinnaajunnaarlutik.

Sillimaniarnermut Aqutsisoqarfiup nittartakkat sorliit saassunneqarnersut oqaatiginngilaa.

DR-ip paasissutissaatai naapertorlugit russit eqimattanngorlutik qarasaasiakkut paasissutissanik aallerlutik pinerliiniartartut NoName057 (16) saassussisuupput.

Russit qarasaasiakkut pinerliiniat akisussaaffigaat

Qarasaasiakkut pinerliiniat taakkua Danmarkimi kommuninut siorna novembarimi qinersisoqarnerani, kommunit ministereqarfiillu nittartagaannik saassussipput.

NoName057 (16) marsi 2022-mili taamaaliortarpoq, nunallu Natomut ilaasortat oqartussaqarfiinut suliffeqarfiutaannullu Europamilu nunanut allanut, russit soqutigisaannut akerliusutut isigineqartunut arlaleriarlutik DDoS-imik saassussisarluni.

Russit eqqimattanngorlutik qarasaasiakkut pinerliiniat NoName057(16), Europami nunat nittartagaannik arlaleriarlutik saassussisartut – ilaatigut danskit nittartagaannik – kalaallit nittartagaannut internetikkut saassussineq akisussaaffiginerarpaat. 

Tamanna eqimattanngorlutik pinerliiniat oqaloqatigiittarfianni, isertuussanik nalunaaruteqartarfimmi Telegram-imi allaqqavoq, TV 2 allappoq. 

TV 2-p nutaarsiassiinera naapertorlugu, maannakkut saassussineq Danmarkip Ukrainemut timmisartunik sorsuutinik tunissuteqarneranut akiniaanerusoq, eqimattaq nalunaarpoq. 

Nittartakkat sorliit saassunneqarnersut suli ilisimaneqanngilaq. 

Internetimi nitartakkat sorliit pineqarnersut Sillimaniarnermut Aqutsisoqarfiup maannamut oqaatigisinnaannginnerarlugu KNR-imut oqarpoq.

Naalakkersuisut allapput   

Saassussinerit paasissutissaatinut navianarnatillu ajoqutaanavianngitsut Naalakkersuisut tusagassiuutinut nalunaarutaanni allaqqavoq.

Internetikkut saassussineq nittartakkat iserfigineqarsinnaanerinut piffissami sivikitsumi  akornusersuinerupput.

‘Amerlanertigut saassussinerit piffissap sivikitsuinnaap iluani aaqqinneqarsinnaapput sakkortuunillu kingunerluuteqartussaanatik’ Naalakkersuisut allapput.

Suliamut tunngatillugu pisunik ataavartumik paasititsisassallutik, Aalisarnermut, Piniarnermut, Nunalerinermut, Imminullu Pilersornermut Avatangiisinullu Naalakkersuisoq Peter Borg (D) paasissutissiivoq.

- Pisut malinnaaffigeqqissaarpagut, aammalu oqartussaasut attuumassutillit pisumut misissuileruttorput ingerlaavartumillu attaveqarfigaagut, . Saassussinerit taamaattut uloriananngimmata erseqqissassallugu pingaaruteqarpoq, Peter Borg tusagassiuutinut nalunaarummi allappoq.