Trumpip avataarsuaneersut pillugit allagaatit tamanut saqqummiunneqarnissaat peqqussutigigaa
USA-p præsidentiata Donald Trumpip naalakkersuisut allagaataat avataaneersunut ilaatigut tunngasut tamanut saqqummiunneqarnissaat peqqussutiginiarpaa.
Inuit attaveqaqatigiittarfianni, Truth Social-imi, tallimanngornerup unnuaani taama allappoq.
- Tamatuma soqutiginnittoqangaarnera paasinarsimmat tamanna pissaaq, Trump allappoq.
Allagaatilli tamanut saqqummiunneqassanersut nalunarallartoq, nutaarsiassaqartitsivik AFP allappoq.
- Soqutiginnittoqangaarnera tunngavigalugu, illersornissamut ministerimut (Pete Hegseth, aaqq.) naalakkersuisoqarfinnullu oqartussaasunullu pineqartunut allanut, naalakkersuisut allagaataannik misissuinerup aallartinneqarnissaa taakkuninngalu saqqummiussinissaq peqqussutigissavara, Trump allappoq.
Allagaatit avataarsuaneersunut, nunap ataani iluanilunniit uumasunut, UAP-nut, ufonut "paasissutissallu allat tamakkununnga paasiuminaassinnaasunut attuumassutillit, sammisanulli soqutiginaatilerujussuarnut pingaaruteqartunullu tunngassuteqartut", Trump allappoq.
Obama pisuutikkaa
UAP tassaavoq Unidentified Aerial Phenomena imaluunniit Unidentified Anomalous Phenomena ufonullu taaguutigineqaleraluttuinnartuulluni.
Trumpip avataarsuaneersut pillugit tusagassiortunut sisamanngornermi aamma oqaaseqarpoq.
Præsidentip Air Force Onemut ilaalluni Georgiamukarnerani tamanna pivoq.
Barack Obama avataarsuaneersut piviusuunerarlugit podcastikkut oqarmat, paasissutissanik isertuussassanik ingerlatitseqqiisimasutut pisuutippaa.
- Kukkorujussuarpoq, Trump oqarpoq.
Obamap - nunarsuup avataarsuata angingaassusia eqqarsaatigalugu, nunarsuup avataani uumassuseqartoqarnera nammineq isumamini ilimanaateqarluarsoralugu erseqqissarpaa.
Tusagassiiviup BBC-p nutaarsiassiinera naapertorlugu, Obamap sammisaq pillugu oqaaseqarnerani paasissutissanik isertuussassanik allanut ingerlatitseqqiisimaneranik takussutissaqanngilaq.
/ritzau/
