Piviusulersaarusiortut Narsarsuup qutsissortaani suugaluarnersunik qaamanernik paasiniaasut

Martin Kleist Narsarsuarmi februaariugaa unnukkut taarsereersoq eqqaavissuup qanittuaniitilluni suugaluarnersunik qaamanernik qaqqat qutsissuatigoortunik takunnippoq.

- Suugaluarnersut qaamanerit takusakka timmisartup mittarfiikkoortup qulliisulli aalapput. Kingumorsorpasilaariarlutik siumukallatsiarput, kingornalu talerpimmut sangoriarlutik saamimmut sangugamik sukkatsiallariarlutik uneriataarput. Kingorna taava qutsissumukapiloorput, taanna oqarpoq.

Suugaluarnersut qaamanerit takusani silassorissuusiaaneragaasartumeersuusut qularinngilaa.

Martin Kleist nuannarilivissimasani, tassa UFO-t pillugit podcastimik 'UFOrklarligt'-mik tusarnaagassiortartuuvoq. Taamaammat timmisartortartup Narsarsuup qutsissortaani suugaluarnersunik qaamaneqarneraalluni attavigimmani nunatsinnukassalluni aalajangerpoq. Piviusulersaarusiortartoq Lasse Rahbek Danmarkimiit kingorna Narsarsuarmukaqatigaa, kalaallinit tusakkani nammineq timitarserusullugit Narsarsuup qutsissuani suugaluarnersut qaamanerit paasisassarsiorfigiartorlugit.

Inuimmi arlallit suugaluarnersunik qaamanernik Narsarsuarmi ukiaq qaqqat qutsissuatigoortoqarneraapput.

Lasse Rahbek tamanna pillugu suliniutaat aallartikkamikkulli alliartorsimasoq pillugu siusinnerusukkut oqaloqatigaarput.

Martin Kleist ilitsersuisorlu Lasse Rahbek nunatsinni UFO-qarneraasarneq pillugu piviusulersaarusiuleruttorput. Lasse Rahbek piviusulersaarusiami 'Sirius'-imi DR-imit 2023-mi aallakaatinneqartumi aamma ilitsersuisuuvoq.

Martin Kleist aamma Lasse Rahbek nunatsinni UFO-qarneraasarneq pillugu piviusulersaarusiortut marsimi oqaluttuarigatsiguli nunatsinni UFO-qarneraallutik taakkununnga attaviginnittut imaaginnalersimapput. Taakkualu Narsarsuup qutsissuani suugaluarnersunik qaamaneqarneraasortaqaqqipput. Taamaammat Martin Kleist aamma Lasse Rahbek kingorna Narsarsuarmukaqqipput.

Oqallisigiuarneqarsinnaasut

UFO-lliukua sorpiaasut-uku?

Nalussagunanngilat UFO-t atuakkiani filmilianilu saqqummiunneqartartut avataarsualiartaammut assingusartut, soorlu puugutaasatut timmisartutut iluseqarlutik suugaluarnersunillu avataarsuarmiunik inuttaqarlutik.

UFO-qarneranik upperinnittoq ajoqusiiniaqatigeeqarsorinnittutut isigineqalersartoq, Martin Kleist isumaqarpoq. Tamannali piviusulersaarusiornikkut allanngortissinnaassagini neriuutigaa.

- Ilumut UFO-qarnersoq oqallisigiuarneqarsinnaavoq. Inuilli UFO-nik misigisaqartarnerat misigisaasalu sunniuttarnerat ilumoorput. Taamaammat ilumooruttariaqarpagut, taanna oqarpoq.

Martin Kleist piviusulersaarusiortartorlu Lasse Rahbek UFO-nik misigisaqarsimasunik attaveqarusupput. Assersuutigalugu 24-nik ukiullip kiunermik isertuussilluni Nuummi UFO-qarneraalluni oqaluttuaa pillugu allaatigisaq taamaallutik siumorpaat. Oqaluttuamik taassuminnga ilisimannittut attavigissagaatsik, Martin Kleistip kajumissaarutigaa. Assi © : AG

Martin Kleistip qilak, ullorissat angalasut UFO-llu meeraallunili soqutigisarilluinnarpai.

Taamaammat UFO-t pillugit podcastimik 'UFOrklarligt'-mik siorna tusarnaagassiortalerpoq, aallakaatitseqatinilu UFO-t taakkualu sorpiaanersut tassani eqqartortarpaat.

- Isumaliutigiinnarsinnaavagut. Anersaarsiornermut arlaatigut attuumassuteqartuusut ilimagilluinnarpara. Anersaarsiornerlu inuiaqatigiinni akuuffigisatsinni assigiinngitsorpassuarnik isumaqarfigineqakkajuppoq, taanna oqarpoq.

Taamaakkaluartoq UFO-t nunani tamalaani nutaarsiassaqartitsivinnit ukiuni kingullerni sammineqangaatsiarput. USA-mmi illersornissamut ministereqarfia Pentagon immiussamik 2020-mi siammarterivoq, suugaluarnersullu silaannakkoortut immiussami tassani takuneqarsinnaapput.

USA-p naalagaaffiani atorfilittaasimasup USA angallatit nunarsuarmeersuunngitsut atortuinik toqqortaateqarnerarmagu kingorna, UFO-t Pentagonimi tusarniaanertalimmik 2023-mi tusarniaanertalimmik politikkikkut oqallisigineqarput.

“Tupinnartunik” misigisaqarsimaneraasut ilumoorukkusukkaat

UFO-t nunatsinni politikkikkut suli oqallisigineqanngillat, Narsarsuulli qutsissuani suugaluarnersut qaamanerit inunnit soqutigineqaalupput.

Narsarsuup qutsissuani suugaluarnersunik qaamaneqartartoq Issittumi Sakkutooqarfimmut januaarimi nalunaarutigineqarpoq. Suliaq taanna Kalaallit Nunaanni Politiinut ingerlateqqinneqarmat, suliami tassani misissuinissamut tunngavissaqanngitsoq politiit kingorna nalileraat, paasissutissani pissarsiarisatsinni erserpoq. 

Martin Kleist aamma Lasse Rahbek Narsarsuarmi UFO-nik takusaqassanasoralutik marsimi immiussipput. Assi © : Lasse Rahbek, Martin Kleist

Nunatta kujasissortaaniinnaanngitsoq suugaluarnersunik qaamaneqarneraasoqartartoq, Martin Kleist oqarpoq.

Sisimiuniimmi Maniitsumiillu suugaluarnersunik qaamanernik takunnissimanerartunit aamma attavigineqarsimavoq.

- Kalaallit tamakkununnga isiginneriaasiat nunanit allaneersuninngarnit allaanerusimagunarpoq. Misigisanik tupinnartunik eqqumiitsunillu eqqartuinissaq ammaffiginerorpasippaat. Matoqqaffiginngilaat, taamaannerallu uagutsinnut periarfissatsialaavoq, Martin Kleist oqarpoq.

Eqqumiitsunilli misigisalikkersaartunut suli aamma nikassaasoqartartoq, taanna erseqqissaavoq.

Taamaammat piviusulersaarusiortut tupinnartunik misigisaqarsimasunik oqaloqateqarusupput, piviusulersaarusiaanni ilaarusunngikkaluarpataluunniit.

- Taakkua suliniutitsinni tunngaviulluinnaqqunaqaat. Pinngortitamimmi eriaginnilluinnarlutillu eqqumiitsunik misigisaqarsimasunut ataqqinnittuupput. Kalaallillu tupinnartunik misigisaqarsimasunut ilumoorussinerusarpasipput, taamaannerallu nuannaartunaqaaq, Martin Kleist oqarpoq.