Folketingip kalaallit ammip qalipaataa tunngavigalugu nikassaasarneq akiorniarlugu tusarniaaviginiaraat

Folketingimi Kalaallit Nunaannut ataatsimiititaliaq kalaallit pisinnaatitaaffii pillugit tusarniaanissamut qaaqqusivoq.

Allattoq Ann-Sophie Greve Møller

februaarip 20-at 2026 10:01

Nutserisoq Medea Olsen

Folketingimi Kalaallit Nunaat pillugu ataatsimiititaliaq februaarip 25-anni tusarniaappat kalaallit misilittagaat pisinnaatitaaffiilu oqaluuserineqassapput.

Tamanna danskit naalakkersuisuisa ammip qalipaataa tunngavigalugu nikassaanermut iliuusissatut pilersaarusiornerannut atatillugu pissaaq. Kalaallit ilungersunartutut misigisartagaat aaqqiissutissallu tassani sammineqassapput.

Julie Rademacher kalaallit inuunerminni artorsaatigisartagaat pisariaqartitaallu pillugit oqalugiassaaq. Aamma Inuit Circumpolar Councilimi siulittaasoq Sara Olsvig, inuit Issittumi pisinnaatitaaffii anguniarneqartullu pillugit oqalugiassaaq.

Aammattaaq Danmarkimi isumaginninnermut ministeri, Sophie Hæstorp Andersen, aaqqissuussinermi peqataassaaq. Taassumap nammineq ministeritut takusani naapertorlugit inuunermi suut qaangerniagassaanersut oqaluuserissavaa.

Oqaluttuarisaanitsinnik eqqarsaatiginninnissaq pingaaruteqartoq

Danskit naalakkersuisuisa pilersaarut kalaallinut ammip qalipaataa tunngavigalugu nikassaanerup atorunnaarsikkiartuaarnissaanut iluaqutaasussaq, aqqaneq-marlunnik iliuuserisassalik, januaarimi siorna saqqummiuppaat.

- Ajornartorsiuterujussuuvoq. Aamma isumaqarpunga uagut (danskit aaqq.) inuiattut kalaallit qanoq oqaluttuarisaanikkut ataqatiginerivut eqqarsaatigissagipput, qanorlu kalaallit Danmarkimiittut pillugit paasinnittariaaserput allanngortissinnaaneripput, danskit nunanut allanut akulerutsitsinermullu ministeriat Kaare Dybvad (S) nalunaarutip saqqummiunneqaqqaarnerani oqarpoq.

Danmarkimi kalaallit nikanarsaataasumik immikkoortinneqartarnerannut akiuinissamut iliuusissatut pilersaarut

Danskit naalakkersuisut kalaallinut nikanarsaataasumik immikkoortitsisarnerup ammillu qalipaataa tunngavigalugu assigiinngisitsisarnerup akiornissaanut ukiunut 2025-mit 2028-mut 35 mio. koruunit immikkoortippaat.

Aningaasat ima agguataarneqassapput 2025-mi 10 million koruunit, ukiunilu 2026-mi 2027-mi 2028-milu ukiumut immikkut 5 million koruunit.

Tamatuma saniatigut 2024-mut aningaasanut inatsimmi suliniutinut arlalinnut aningaasanik immikkoortitsisoqareerpoq.

Danskit naalakkersuisui Danmarkimi ammip qalipaataa tunngavigalugu assigiinngisitsisarnermut ataatsimut aamma suliniuteqarniarput.

Allisiguk

Kattuffiit arlallit kalaallit assigiinngisitsinermik ammillu qalipaataa pillugu nikassarneqarnermik aqqusaagaqartarsinnaanerat pillugu ukiorpassuarni eqqumaffiginninnerulersitsiniarlutik suliaqareersullu, iliuusissatut pilersaarut pilersinneqarpoq.

Folketingimi tusarniaaneq februaarip 25-anni pissaaq, peqataajumasullu uani nalunaarnissaat piumasaqaataavoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.