Millionilikkuutaat Danmarkimi kalaallinik nikassaasoqartarnerata akiornissaanut atorneqassasut
Danmarkimi kalaallinik ammip qalipaataanik tunngaveqartumik assigiinngisitsisoqartarnera, nunatta politikeriisa Danmarkimilu kalaallit peqatigiiffiisa ukiorpassuanngortuni nilliaatigaat.
Tassalu Naalagaaffiup Danmarkimi kalaallinik nikassaasoqartarnerata akiornissaanut iliuusissatut pilersaarutitaava aqqaneq-marlunnik aaqqiissutissatut suliniutitalik, Danmarkimi naalakkersuisuisa ataasinngornermat saqqummiuppaat.
- Aaqqitassaqaqaaq. Aamma Kalaallit Nunaallu oqaluttuarisaaneqarnitsinnik uagut (qallunaat, aaqq.) isumaliutiginninnissarput pingaartoq aamma isumaqarpunga, aamma Danmarkimi kalaallinut isiginneriaasitsinnik allannguinissarput, Danmarkip nunani allamiunut akuulersitsinissamullu tunngasuni ministeria Kaare Dybvad (S) iliuusissatut pilersaarutitaap saqqummiunneqarnerata kingunitsiannguagut oqarpoq.
Aaqqiissutissatut suliniutit aqqaneq-marluk taakkua Danmarkip ammip qalipaataanik tunngaveqartumik tamanut assigiinngisitsinnginnissamut iliuusissatut pilersaarutitaassaani piariingajalertumi aamma ilaapput. Taamaakkaluartoq qallunaat naalakkersuisui 35 millionit koruuninik tassa Danmarkimi kalaallinik nikassaasoqartarnerata akiornissaanut aaqqiissutissatut suliniutinut taamaallaat 2028-p tungaanut agguarlugit atugassatut aningaasaliipput.
Kalaallit Danmarkimi Illutaannut aningaasaliinerunissaq kalaallisullu oqaluttaasartunik piginnaanngorsaanissaq Iliuusissatut pilersaarutitaami aaqqiissutissatut suliniutinut ilaapput.
Kalaallisut oqaluttaasartunik piginnaanngorsaanermut 6 millionit koruuninik aningaasaliisoqareerpoq, taakkuali 5 millionit koruuninik ilaneqarnissaat 2028-p tungaanut ukiut tamaasa isumaqatigiinniutigineqartassaaq.
Aaqqiissutissatut suliniutit ilaat nutaajunngitsoq
Iliuusissatut pilersaarummi aaqqiissutissatut suliniutit nutaajunngitsortaat ilaatigut Atlantikup Avannaata naalagaaffeqatigiinnerullu Danmarkimi atuartitsissutaanerulernissaannut tunngassuteqarpoq. Tamannami ukiup atuarfiusup nutaap siorna aallartinneranili piumasaqaataalerpoq. Taakkuali atuartitsissutaasarnissaannut suli sivikinnerpaaffiliisoqanngilaq – aamma iliuusissatut pilersaarutitaami ataasinngormat saqqummiussami.
Atuarfiilli ilinniartitsisullu ataasiakkaat naalagaaffeqatigiinneq Atlantikullu Avannaa pillugit qanoq atuartitsissutigitigisassaneraat namminneq aalajangertassappassuk, taava Danmarkimi atuartut Kalaallit Nunaat pillugu paasisimasaqarnerulernissaat qanoq iliornikkut qulakkeerneqarsinnaava?
Danmarkip nunani allamiunut akuulersitsinissamullu tunngasuni ministeria Kaare Dybvad (S) oqaloqatigigatsinni tamanna ilaatigut apeqqutigaarput.
- Kalaallit Nunaat pillugu atuartitsinissaq tulleriissaarinermi imaasinnaasoq salliutinneqarpallaanngitsoq. Taamaattussaanngilarlu. Danmarkimmi oqaluttuarisaanerani ilungersunarsimasinnaasut pillugu atuartitsisoqartariaqarpoq, taanna oqarpoq.
Kalaallisut inuiaassuseqarneq passimi nalunaarsoqqasinnaalissasoq
Danmarkimi efterskolit peqatigiiffiannik suleqateqarneq qallunaat naalakkersuisuisa aamma nukittorsarniarpaat, kalaallit efterskolertut atugaat tassuunatigut pitsanngorsarniarneqarluni.
Qallunaatut inuiaassuseqaannarani aammali kalaallisut inuiaassuseqarneq kalaallit passiini aamma nalunaarsoqqasinnaalissasoq, tassa kalaallisut danskisullu innuttaassuseqartutut allassimalersinnaassasoq, iliuusissatut pilersaarummi aamma allaqqavoq:
- Danmarkip naalakkersuisuisa iliuusissatut pilersaarut kinguneqarnersoq alaatsinaaffiginiarpaat. Tamanna ukiuni tulliuttuni ineriartornerup misissuiffigineratigut pissasoq, Kaare Dybvad oqarpoq.
Kaare Dybvad oqaloqatigigatsinni iliuusissatut pilersaarummi immikkoortut allat arlallit pillugit aamma oqaaseqarpoq. Tamanna pillugu KNR-imit allaatigisarput ulluni tulliuttuni saqqummiutissavarput.
