Ane Lone Bagger politikkimut uteqqittoq

Ane Lone Bagger Ilinniartitaanermut, Ilageeqarnermut Nunanullu allanut tunngasunut 2018-imit 2020-mut Naalakkersuisuusoq politikkimut maanna uteqqippoq.

- Tassa politikkimut uteqqippunga piareersimaqqilersimasutut misigisimagama, Ane Lone Bagger oqarpoq.

- Isumaga malillugu folketingimut ukioq manna qinersinissaq aatsaat taama pingaaruteqartigaaq, taanna oqarpoq.

Nunatta namminiilivinnissaa sulissutiginiaraa

USA-p præsidentiata Donald Trumpip nunarput oqartussaaffigilerusullugu oqaaseqaqattaarnera taama isummernermini tunngavilersuutigaa.

- Tassa ilisimavarput USA-p præsidentiata nunarput qanoq ulluni makkunani, ukiullu kingulliit eqqarsaatigalugit tatisigaluttuinnarluni allaat tiguaarusulluni inissisimavoq, taanna oqarpoq.

Ane Lone Baggerip Folketingimut qinigaassagaluaruni nunatta naaminiilivinnissaata tuaviuussaangitsumik peqqissaartumik suliarineqarnissaa sulissutiginiagaasa ilagaat.

- Nunarput namminiilivikkiartorpoq, taanna avaqqunneqarsinnaanngilaq. Taamaattumik aamma namminiilivikkiartorneq eqqarsaatigalugu peqqissaartumik tuaviupilunngitsumik ingerlanneqarnissaa aamma kissaatiginartorujussuuvoq.

Oqartussaaffiit danskit suli oqartussaaffigisaat soorlu politeeqarneq, eqqartuusiveqarneq allallu nunatsinniit oqartusaaffigileriartuaarnissaat nunarput sinnerlugu folketingimut ilaasortanngortussat aamma ukkatariasariaqassagaat isumaqarpoq.

- Pingaaruteqarluinnarpoq aamma kunngeqarfimmi kalaallit inuiaat ataqqinartumik naligiissitaanissaat suli annerusumik sukataarullugu ingerlanneqartariaqartoq, Ane Lone Bagger oqarpoq.

Siumut kisiartaalluni qinigassanngortitassaminik marlunnik maannamut nalunaaruteqareerpoq. Aka Hansen Folketingimut qinigassanngortinniarluni siusinnerusukkut nalunaaruteqarpoq.

Folketingimut ukioq manna kingusinnerpaamik oktobari naatinnagu qinersisoqartussaavoq.