Isumaginninnermi ikiortitut ilinniarneq sivikillilertoq
Perorsaanermik Ilinniarfiup ilinniakkamik sivikilliliineq ilinniartunut naammassinnittartunut amerlisaataassasoq, ilinniarfiup pisortaata neriuutigaa.
Isumaginninnermut Ikiortinngorniat holdit sisamakkaarlutik ilinniarlutik aallartittarput.
Allattoq Steve Pedersen Hinrup
februaarip 19-at 2026 15:29
Perorsaanermik Ilinniarfimmi Isumaginninnermi Ikiortitut ilinniarnerup sivisussusaa ukiumik ataatsimik sivikillineqartussanngorpoq.
Perorsaanermik Ilinniarfik tusagassiuutinut taama nalunaarpoq.
Isumaginninnermi Ikiortitut ilinniarnerup aaqqissuussaanera nutarterneqarpoq, taannalu aasaq maannamit atuutilissaaq.
Isumaginninnermi Ikiortitut ilinniarsimasut meeqqerivinni, utoqqaat illuini assigiinngitsunilu sulisarput.
Ilinniarfiup aaqqissuuteqqinnerani ilinniarnerup sivisussusaa ukiunik marlunnik sivisutigiunnaarluni ukiumik ataatsimik sivisussuseqalissaaq.
Isumaginninnermi - Peqqissaanermilu Ikiortitut ilinniarneq atagallarmat ilinniarfik ukiunik marlunnik sivisussuseqarpoq, ilinniagarli marlunnut avinneqarmat allannguinissaq pisariaqarsimasoq, Perorsaanermi Ilinniarfimmi pisortaq, Ulunnguaq Markussen nassuiaavoq:
- Massakkullu ullumikkut takusinnaasatsinni ilinniagaq taanna qaffasissutsiminut sanilliullugu sivisuallaartutut taavalu naapertuutinngitsutut nalilersinnaagatsigu ukiunik marlunninngaanniit ataatsimut sivikillineqarnissaa aalajangersimavarput, taanna oqarpoq.
Isumaginninnermi Ikiortitut ilinniartut 100-t missaaniittarput, taakkunanilu amerlanerit ilinniakkaminnik unitsitsisartut, pisortap oqaatigaa. Tamannalu akiorniarlugu allannguinermut peqqutaaqataanerarpaa.
- Tassani takusinnaasarparput ukiup ingerlanerani ilinniartut affai sinnerlugit ilinniakkaminnik unitsitsiinnartartut. Taamaattumik ikittuarannguit tassani ilinniakkami naammassisarput, tamannalu ilaatigut akiorniarlugu ilinniagaq massakkut sivikillivarput, Ulunnguaq Markussen oqarpoq.
Suliffimmik misiliinerit marluusaraluartut aamma ataasiinnanngortinneqarpoq. Allannguinerli suliassamut pikkorissusermut piginnaaneriligassanullu allannguutaassanngitsoq, Perorsaanermik Ilinniarfiup pisortaa, Ulunnguaq Markussen oqarpoq:
- Allanut ilinniakkanut ikiortinngorniarluni ilinniarfinnut, soorlu Peqqissaanermi Ilinniarfimmi ikiortinngorniaqarpoq aamma Inuilimi ikiortinngorniaqarluni. Taakkununnga sanilliullugu suli atuagarsorneq maani Isumaginninnermi ikiortinngorniarneq sivisunerussammat, tassani peqqutaavoq suliffimmik misileraanerup marluunani ataasiinnaanera.
Nuummi Isumaginninnermi Ikiortinngorniat Ilulissani qaammatini sisamani atuagarsortaraluarput, Nuummi ilinniartut aasaq maannamit Ilulissanukartarunnaassasut, Ulunnguaq Markussenip aamma oqaatigaa.
Perorsaanermi Ilinniarfimmi ilinnialernissamut qinnuteqarfissaq ilinniarfiit allat assigalugit marsip aallaqqaataani killeqarpoq.
