USA-mut akerliulluni allagartarsuit piiarneqartut

Innuttaasut arlallit kikkuuneri ilisimaneqanngitsut Nuummi sumi tamaani allagartarsuarnik ataasinngormat unnukkut nivinngartuisimapput.

Allagartarsuit USA-mut USA-llu Kalaallit Nunaannik qaninngoorniarneranut akerliunermik takutitsisuupput.

Inuussutissarsiorneq pillugu ataatsimeersuarnerup Future Greenlandip Katuami marlunngornermi ullaakkut ammarnissaanut atasumik nivinngartuisoqarpoq. 

Tassani peqataassapput Amerikamiut aallartitaat Kenneth Howery, aamma præsident Donald Trumpip Kalaallit Nunaannut immikkut aallartitaa Jeff Landry.

Kisianni allagartarsuit amerlanersaat marlunngornermi ullaakkut piiarneqarsimapput.

KNR-ip aaqqissuisuusut ilaat kinaanerminik isertuussiumasoq attavigivaa. Taanna oqaluttuarpoq, allagartarsuit 150-it missaat nivinngarneqarsimasut.

Nuup qeqqani pingaartumik Katuap eqqaani allagartarsuit 150-it unnukkut nivinngarneqarsimapput. Ima oqariartuutilik: USA ASU (USA, asu, aaqq.) Assi © : Privatfoto

Allagartarsuit periarfeerunneqartut

KNR-ip Kommuneqarfik Sermersooq attavigivaa. Kommunimiit ilisimatitsissutigineqarpoq namminneq allagartarsuit piiarsimanagit.

Taamatuttaaq Kalaallit Nunaata Politiivi oqarput, allagartarsuit nivinngartiterneqarneri ilisimagaluarlugit, piiarneqarnerinut peqataasimanatik.

Allakkatigut akissuteqaammi Katuap pisortaa, Ivaaq Kriegel, allappoq, sulisumi allagartarsuit piiarsimanngikkaat.

Aammattaaq Amerikamiut Konsuleqarfiat KNR-imut ilisimatitsivoq, allagartarsuarnut tunngasunik ilisimasaqaratik.