Kalaaleq Karoline Nielsen qaannamik parrunnermi Europami pissartanngorniuteqataalerpoq

Kalaaleq 22-nik ukiulik qajartortartoq Karoline Nielsen qallunaat U-23-ni nunanut allanut unammisartuinut toqqagaanermigitu Europami pissartanngorniuttunut peqataalerpoq.

U-18-niit U-23-nut Europami pissartanngorniunnerit julip aallartilaarnerani Rumæniami pissanpput tassanilu qaannami kisermaattarissami 200 meterimut parrunnermi Karoline Nielsen peqataassaaq.

- Isorartussuseq taanna unammissutigalugu nuannarinersaavara tassa 200 meterimut kisermaattarissami parrunneq, Karoline Nielsen KNR-mut oqarpoq.

Inuusuttut pissartanngorniunneranni siornatigut Karoline Nielsen Danmark sinnerlugu unammeqataasareerpoq soorlu nunarsuarmi pissartanngorniunnermi, Europami pissartanngorniunnermi nunallu avannarliit pissartanngorniunneranni.

Nunat tamalaat unammineranni qaannat kulfiberinik glasfiberinillu sanaajusut atorneeqartarput. Karoline Nielsenilli aataa Saattuni kalaallit qajaannik atuisoq qajartortalernissamut nuannaartorisaalluni aallaaviuvoq ullumikkullu Karoline Nielsenip Silkeborgip tasiini sungiusartarpoq.

Siumut nalileruminaatsoq

Maanna 22-nik ukioqalereernermini siullerpaamik U-23-ni unammeqataasussanngorpoq.

- Qanoq ilimasuuteqarnissaq oqaatigiuminaatsorujussuuvoq. Pikkorissorujussuupput. VM-mut nallersuussinnaasumik pikkorissusaat qaffasissuseqassaaq, Karoline Nielsen oqarpoq.

- Ilimagaara arnat taakku nukittoqisut aamma ukioqqortussutsini qaffaallannikuugama siornatigut nunani tamalaani unammeqataaffiginikuunngisanni. 2021-ip kingorna EM-mi imaluunniit VM-mi peqataanikuunngilanga. Maannamulli pikkorinnerit tallimat akornanniikkusoqaanga, Karoline Nielsen oqarpoq.

Toqqagaanissani sioqqullugu sulinini tunulliukkallarlugu sapaatip akunneranut nalunaaquttap akunneri 16-18-it sungiusartarpoq. EM-mullu toqqagaanermigut sungiusarnissamut piumassusineriaannarpoq.

200 meterimut naatsumut unamminermi aallariapiloortarneq pingaarutilerujussuuvoq aallarluarnerullu attatiinnarnissaa. Taamaattumik qaannamik nunanut allanut unammisartut Rumænialiajaassapput avatangiisit sungiunniariartussallugit.

- Aallariariasaartarneq sungiusassagunarparput aallartussaaqattaarluta aallarluarnissaq piareersarlugu. Oqareernittut naatsumut unammineruvoq, taamaattumik aallarluarnissaq aamma pingaaruteqartorujussuuvoq, Karoline Nielsen oqarpoq.

Timersuummini aamma siunissaq eqqarsaatigalugu takorluugaqarpoq.

- Kalaallit Nunaat sinnerlugu World Cupimi unammeqataarusuppunga. Atagu takussavarput tamanna piviusunngorsinnaajumaarnersoq, Karoline Nielsen oqarpoq.