Qajaq: Nunani avannarlermiut pissartanngorniunneranni Karoline Nielsen tallimanik kultinnappoq

Qaannat plastikkiusut atorlugit naatsumut parrunnermi nunani avannarlermiut augustip qeqqani Norgemi pissartanngorniummata Danmarkimeersut siuartuupput.

Ujaminnalluartut ilaat tassaavoq Karoline Nielsen Nuummi inunngortuusoq maannalu Silkeborg Kajak Klub sinnerlugu unammisartuusoq.

Ujaminnattut qaqisarfiannut arfineq marloriarluni qaqivoq taakkunannga tallimariarluni kultinnattutut marloriarlunilu sølvinnattutut.

- Ilimasuuteqarpallaarnikuunngikkaluarpunga. Arlaliuttarissani kultit marlussuit ilimaginikuuakka. Neriuutiginerpaanikuuaralu pingasunik kultinnassinnaanissara, Karoline Nielsen KNR-mut oqarpoq.

Peqataaffigisai tassaapput qajaq sisamaattariaq, marluuttariaq aammalu nammineq tupaallaatigisaminik kisermaattarissami angusarissaarluarluni.

Piumassusineqqittoq

Sungiusarnissamut Karoline Nielsen aasaq piumassusikilligaluarpoq. Aamma Europami nunarsuarmilu pissartanngorniuttunut toqqagaanngilaq siornatigut qallunaat nunanut allanut unammisartui peqataaffigisareeraluarlugit.

- Sapaatit akunneri marluk uninngagama misigivunga qajartorneq maqaasilerlugu. Tamatuma kingorna tamaviat sungiusarpunga, Karoline Nielsen oqaluttuarpoq.

- Sapaatit akunnerit marlussuit atorlugit nunani avannarlermiut pissartanngorniunnissaannut sungiusarpunga ilimagisanniillu angusarissaarnerullunga, Karoline Nielsen oqarpoq.

Sapaatip akunnerata naanerani Danmarmi pissartanngorniuttuni peqataassamaarpoq. Maannalu piumassusineqqippoq ukiuunerani sungiusarluarnissamut aappaagu unammisaleqqinnissamut piareersarluni.