Qajaq: Karoline Nielsen ukioqatimini Europami sukkanerit tallimat akornanniippoq

Ukiuni sisamanngortuni siullerpaamik nunat tamalaat unammineranni peqataaqqilernermi 22-nik ukiulik Karoline Nielsen paarluni sungiusarnissamut piumassusinilluaqqavoq.

Qallunaat nunanut allanut unammisartui sinnerlugit U-23-it Europami pissartanngorniunneranni peqataavoq juli aallartilaartoq parrunneqarmat.

Karoline Nielsen Saattormiunik siuleqartoq unamminissat sioqqullugit ilimasuutinik taasaqarnissamut nalornivoq. Tassami siullerpaamik U-23-ni unammeqataavoq ukiunilu sisamani aatsaat siullerpaamik nunani tamalaani unammeqataaqqilluni.

Karoline Nielsen qaannami kisermaattarissami 200 meterimut unammeqataavoq.

- Aallarniutaasumik parrunnermi peqataaninni pingajuattut inissippunga taamalu toqqaannartumik finalemut anngullunga, Karoline Nielsen KNR-mut oqaluttuarpoq.

Finalemi aamma aallartilluaqaaq.

- Assut aallarluarpunga qaannap takissusaanik ilannit siuaraluarlunga kisianni taava aqqutaani qasuleriartorpunga. Taamaattoq assut naammagisimaarinnippunga, Karoline Nielsen oqarpoq.

Apuunniukkamik aamma naligeeqaat

- Bronzemut 0,3 sekundit kisiisa amigaatigaakka, taamaattumik pisinnaasara tamaat iliortutut misigisimavunga, Karoline Nielsen oqarpoq.

- Pitsaassuseq qaffasippoq aamma unammisatta ilai World Cupimi unammisarput ataaserlu aamma inersimasuni sisamaattut inissilluni. Taamaattumik arnanut imaannaanngitsunut unammivunga, taamaammat naammagisimaarinnittorujussuuvunga, Karoline Nielsen oqarpoq.

Piumassusinilluarpoq

Maanna Silkeborgip tasiini sungiusaqqilereerpoq kingusinnerusukkullu VM-rtoqarnissaanut Danmark sinnerlugu unammiartortussat toqqarneqarnissaannut pissangalluni.

- Sungiusanissamut assut piumassusineqqavunga. Kiisami takutisiinnaanikuuara sunik piginnaasaqarlunga aamma taamaasiorsinnaanikuunnginnama ukiuni sisamani nunat tamalaat unammineranni peqataanikuunnginnama. Taamaattumik una pisoq assut siunissamut piumassusininnarpoq, Karoline Nielsen oqarpoq.

Qaannat kulfiberimik glasfiberimillu sanaajusut atorlugit unammisarpoq.

Kalaallit qajaat atorlugit aqagumiit Sisimiuni unammeriaatsini assigiinngitsuni Nunatsinni unammersuartoqalerpat. Unammersuarnerit QU-mut naalisarneqartartut KNR-TV-mi toqqaannartumik aallakaatinneqassapput.