Takornarialerisumik pikkorilluinnartunik naapitsinikuuit? Unnuisarfimmi nuannerluinnartumi unnuinikuuit imaluunniit takornarialerinermik suliaqartunik nersorniarneqartariaqartunik ilisimasaqarpit?

Taamaappat sapaatini akunneri arlallit tassa aggustip 15-iata tungaanut pineqartoq Greenland Tourism Award 2025-mut innersuussinnaavat. Nersornaat Visit Greenlandimit aamma Air Greenlandimit takornarialerisunut immikkut ittumik suliaqarsimasunut ukiut tamaasa tunniunneqartarpoq.

- Nersornaat takornariaqarnermik ingerlatsisumut, misigisassanik pitsaasunik tunniussisartumut, nutaaliorluni suliaqartartumut aamma inuiaqatigiinni, aningaasarsiornikkut aamma avatangiisinut tunngatillugu akisussaassuseqarluartumut – malittarisassat aalajangersimasut naapertorlugit tunniunneqassaaq, Visit Greenland tusagassiuutinut nalunaarummi allappoq.

Takornarialersut, Disko Adventures Qeqertarsuarmeersoq Danny Mølgaard, Naja Bjerregaard aamma Steve Brobergimit ingerlanneqartoq siorna nersornaaserneqarpoq.

Ukioq manna takornariaqarnermut nersornaaserneqartoq septembarip 29-ani saqqummiunneqassaaq. Nersornaasiinissamut innersuussisinnaavutit piumasaqaatillu uani atuarsinnaavatit (tuluttuua aajuna).