Assi: Jonas Løvschall-Wedel

Qulaarpaa Immikkoortortami pisortap ilinniartut piginnaasakippallaarsorai

Ilinniartut Ilisimatusarfimmi aallartikkaagamik piareersimaneq ajorput.Ilinniartorpassuillu uniinnartarlutik, immikkoortortami pisortaq Karen Langgård oqarpoq.

Ilinniartut Ilisimatusarfimmi aallartikkaagamik piareersimaneq ajorput. Tassa ilinnialernissamut piareersimaneq ajorput allallu illoqarfimmut allamut nuulluni nutaamik inuuneqalernissamut piareersimasaratik. Taavalu aamma ilinnakkap imarisaanut inorsartarlutik.

Unammillernartullu ilinniartorpassuit uniiinnarnerannik kinguneqartarput.

2011-imi ilinnialertut 35 procentiinnaat ilinniakkaminnik naammassinnipput. Ilinnialertut affaat uniinnarput, 16 procentiilu suli atuarlutik.

Ilinnialertut piginnaasaannik ajornartorsiuteqartut

Ilisimatusarfimmi oqaasilerinermut, atuakkialerinermut tusagassiuutilerinermullu immikkoortortami pisortap Karen Langgårdip unammillernartut isertuutinngilai.

- Ilinnialertut piginnaasaannut tunngatillugu ajornartorsiuteqartaqaagut, Karen Langgård oqarpoq.

Ajornartorsiutit Karen Langgårdip isigisai minnerunngitsumik tassaapput,  ilinniartitsisut ilinniartunut sanngiitsunut nukippassuarnik atuisariaqartaramik, taavalu aamma ilinnialertartut amerlavallaat piareersimanngippallaarnerat ilinniartoqataannut ajoqutaasartoq takusarpaa.
- Ilinniartoqatigeeqarsimavoq uumassuseqarpallaanngitsunik, taakkualu qaffasissusissaagaluaq killilertarpaat immaqalu pikkorinnerpaat piumassuseerutsittarlugit.

Aamma atuaruk Qulaarpaa Tine Pars: Ilinniartut piginnaasallit isiginiarneqartariaqarput

Aallartittartut piareersimaneq ajortut

Aamma ilinnialertartut inuttut ajornartosiuteqartarnerat ilaalluinnarpoq, ilinnialertartummi ilaannat piareersimasarput.
-  Aallartittartut amerlavallaat piareersimaneq ajorput. Ilinniartoorusupparput kisiannili piumasarineqartunik ilungersuuteqarnnissamut piumassuseqarneq ajorlutik.

Tamakkua saniatigut inuusuttut inuuniarnikkut ajornartorsiutinit sunnersimaneqartaqisut Karen Langgårdip aamma tikkuarpaa. Kiisalu  ilinniartitaanermik aaqqissuussineq piginnaasaqalernissamik annerusumik piumasaqarfiunngitsoq aamma takusarpaa.
- Imaassinnaavoq atuarfiup atuartut toqqissisimatikkusuttarsimagai, tamannalumi ataqqinarpoq. Kisiannili imarisamigut unammillernarnera naammannani.

Aamma atuaruk Pitsaassutsimik qaffassaaniarneq inissaqartitsilluarnermut ajoqutaassaaq

Kalaallisut piginnaasaat appasittut

Karen Langgårdilli ajornartorsiutit naammattoortagai imarisanut tunnganerpaapput. Taassuma iliniartuni nunarsuarmut nunanullu allanut alakkaamaneq maqaasivaa. Taavalu Ilinniartut amerlasuut danskit tuluillu oqaasiinut inorsarlutik.


- Uagullu ilinniartitsissutigisarput kalaallisut ilitsoqqussaralugu oqaasilinnut ilinniagassaasoq, tamatumanili piginnaasakeqimmata ajornerpaavoq.

Taassuma oqaatigaa ilinniartut amerlasuut oqaatsit ilitsoqqussatik ilisimalluarneq ajoraat nalunngeriigassatillu aamma ilisimassanagit.

Aamma atuaruk Ilinniarfissuaq EVA-p naliliinerani angusinngitsoortoq


- Assersuutingalugu kalaallisut oqaaseqatigiiliornermi naliginnaasuulluinnartunik ilinniartittariaqartarpakka, naak meeqqat atuarfianni minnerni tamakkua ilikkareersimasussaagaluaraat, Karen Langgård oqarpoq.

Karen Langgårdilli aamma erseqqissarpaa ilinniartut taamaatiinnangitsut aamma pikkorilluinnartunik ilaqartartut.

Aamma atuaruk Pars: Ilisimatusarfimmi ilinniartut oqaatsitsigut ajornartorsiortut amerliartortut

 

 

Isummersuutit


 

Pages