USA Cubap præsidentianut allanullu pillaatisianik atuutilersitsisoq
USA Cubap præsidentianut Miguel Díaz-Canelimut allanullu arlalinnut pillaatissiivoq.
Tamanna Amerikamiut aningaasaqarnermut ministereqarfiata nittartagaani atuarneqarsinnaavoq.
Pillaatissiinerit inunnut allanut sisamanut suliffeqarfinnullu kattuffinnulluunniit tallimanut aamma atuupput - ilaatigut Cubami sakkutuut mumisitsiniaasut ministereqarfiannut.
Aammattaaq præsidentip nulia, Lis Cuesta Peraza, ernersiaalu Manuel Anido Cuesta allattorsimaffimmiipput.
Reutersip nutaarsiassiinera naapertorlugu Díaz-Canelimut pillaatissiineq USA-p qeqertamut naalagaaffiusumut kommunistinit aqunneqartumut tatisineruleraluttuinnarnermini iliuuserisaata kingullersaraat.
Cubami præsidentip 66-inik ukiullip, Raúl Castro, aqutsisuusimasup Fidel Castrop qatanngutaa, præsidentitut 2018-imili kingoraarpaa.
USA-p pillaatissiinera præsident Donald Trump Cuba pillugu tusagassiortunut sisamanngornermi oqaaseqarmat nalunaarutigineqarpoq.
USA-p Cuba “nunatut aqunneqarluarnissaa” kissaatigigaa, taassuma oqaatigaa.
- Cubamut tunngatillugu pilersaarutigissaarpugut.
- Cuba isumagissavarput, ("take care of Cuba", aaqq..) præsidenti itisiliinani oqarpoq.
Naalagaaffissuarmit saassussineq akiorniaraat
Miguel Díaz-Canelip pillaatissiinerit X-imi oqaaseqarfigalugit allaaserai.
- USA-p naalakkersuisuisa saassussinerat kanngunartuliorumassuseqarnerallu, uagut pisinnaasunut ajornerpaanut akiuukkumalluta naalagaaffissuarmiillu saassussinermut akiuukkumalluta aalajangernitsinnut aporaakkumaarpoq.
USA-p naalakkersuisui Cubami atorfilinnut aqqanilinnut, ilaatigut attaveqaqatigiinnermut ministerimut, sakkutooqarnermut pisortanut arlalinnut nunamilu isertortumik paasiniaasartut pingaarnersaannut, qaammat kingulleq pillaatissiipput.
USA-mi oqartussaasut præsidentiusimasoq Raul Castro 94-inik ukiulik toqutsisimasutut unnerluutigineqartoq, maajip naanerani nalunaarutigaat.
Cubap USA-llu 1996-imi akerleriinnerannut atatillugu sisamanik toqutsisimasutut, marlunnik timmisartunik aserorterisutut ataasiarlunilu Amerikamiunut toqutsiniarluni pilersaaruteqarsimasutut unnerluutigineqarpoq.
Inuit kattuffiillu pillaatissinneqartut allattorsimaffiat, USA-p aningaasaqarnermut ministereqarfiani nunat allat pigisaannik nakkutilliisoqarfiup allaffiata, OFAC-ip, aquttarivaa.
Allattorsimaffik pineqartoq tassaavoq Specially Designated Nationals (SDN).
Allattorsimaffimmut ilassutit USA-p Cubami naalakkersuisuinik kommunistiusunik uppititsisinnaanera piffissami kingullermi isumaliutersuutaareersorlu, ilanngunneqarput.
/ritzau/Reuters
