Great Greenland ukioq allanngorartoqarfiungaatsiaraluartoq millioninik sinneqartooruteqartoq

Great Greenlandip 1,3 millioninik 2025-mi amigartooruteqarnissaa naatsorsuutigineqaraluarpoq.

Ammerivilli 1,6 millionit koruuninik sinneqartooruteqarpoq.

Tamanna naatsorsuutini nutaani, Great Greenlandip ataatsimeersuarnerani akuerineqartumi allassimavoq.

Ammeriviup ukiumi kingullermi 1,1 millionit koruuninik amigartooruteqarnerata kingorna angusat pitsaalluinnartut suliffeqarfiup nammineq oqarnera naapertorlugu naatsorsuutigisamit kaaviiaartitaqarnerunermik aningaasartuutikinnerunermillu pissuteqarput.

Great Greenlandip nunat tamalaat akornanni immikkoortortaqarfia pisiniarfimmi, suliffeqarfinnut aamma takornariaqarfiunerup nalaani tunisaqarnermi iluatsitsingaatsiarsimavoq:

- Tamatuma saniatigut nioqqutissanik piareeriikkanik piumasaqartoqangaatsiarnera pissutigalugu tunisassiorneq piffissap ilaani malinnaaniarnermi ajornakusoorsimavoq, naatsorsuutini allassimavoq.

Namminersorlutik Oqartussanit millioninik tapiissuteqarfigineqartoq

Sinneqartoorutit 2025-mi kisimik amerlinngillat. Kaaviaartitat 2024-mi 14,3 millionit koruuniusut 2025-mi 15 millionit koruuniulerput.

Puisilli amiinik tunisaqarneq 8.000-it missaannik ikillutik 26.672-inngorput.

- Puisilli amii 2025-mi tunineqartut 2024-mit ikinnerugaluartut amerlassusaat naammagisimaarnarput, 2023-mullu assersuutigineqarsinnaallutik, ukiumoortumik nalunaarusiami allassimavoq.

Great Greenlandilli imminut napatissinnaanissaanut Namminersorlutik Oqartussanit tapiissuteqarfigineqarnissaa suli pisariaqarpoq. 

Piniartut 2025-mi 12,6 millionit koruuninik tapiissuteqarfigineqarput, aamma allaffissornermut tunisinermullu aningaasartuutinut 10,4 millionit koruuninik tapiissuteqartoqarpoq.

Great Greenlandip takutitsivia tamatuma saniatigut 2 millionit koruuninik tapiissuteqarfigineqarpoq. Takutitsivik Qaqortumi inissisimasoq umiarsuit takornariartaatit aqqutaanik allannguineq pissutigalugu 2025-mi ilungersunartorsiorpoq.

- Great Greenlandip Namminersorlutik Oqartussanit tapiissutit suli pisariaqartippai, pisortaq, Aviaja Holm Jensen ataatsimeersuarnermi oqarpoq.

Siulersuisut nutaat

Great Greenlandimili aaqqissussaanikkut arlalinnik aamma ilungersunartoqarpoq.

Suliffeqarfimmi teknikkikkut ajutoornerit, aningaasaqarnermik aqutsissummik nutaamik atulersitsinermik kiisalu allaffissornikkut piffissap ilaani ilungersuanermik aamma unammilliuteqartoqarsimasoq naatsorsuutini aamma atuarneqarsinnaavoq.

Pisortaasimasoq, Preben Møller atorfimminit siorna tunuarpoq, aamma siulersuisunut siulittaasoq Juliane Henningsen Heilmann aamma siulersuisunut ilaasortat marluk.

Pisortap nutaap, Aviaja Holm Jensenip siulersuisullu nutaat kaaviiaartitat 2026-mi ikililaarsinnaanissaat 44.000 koruuninillu sinneqartooruteqarnissaq naatsorsuutigaat.

Great Greenlandip nammineq aningaasaliissutai ullumikkut 24 millionit koruuniupput.