Great Greenland nutaamik pisortartaartoq
Great Greenlandimi siulersuisut Aviaja Holm Jensen decembarip aallaqqaataa 2025 aallarnerfigalugu pisortanngortussatut toqqarpaat.
Great Greenland immikkut ittumik ataatsimeersuareerluni tusagassiuutinut nalunaarummi allappoq.
Aviaja Ilisimatusarfimmi inuiaqatigiilerinermi bacheloritut ilinniagaqarpoq, taannalu Great Greenlandimi ukiuni arfineq-marlunni atorfeqarpoq. Taamaammat suliffeqarfiup isumaanik, periarfissarissaarneranik ulluinnarnilu ingerlatsineranut ilisimasaqarluarlunilu pitsaassuseq ineriartornerlu ilisimasaqarfigilluarai tusagassiuutinut nalunaarummi allassimavoq.
Pisortanngortup Great Greenlandip pitsaasumik isigineqalersikkusukkaa
Aviaja Holm Jensen pisortaagallartutut atorfeqarnini pissutigalugu suliffimmut misilittagaqareerpoq, taamaammat suliamik ingerlatseqqinnissani qilanaaraa.
- Great Greenland A/S-imi pisortaanerugallartutut atorfeqarninni immikkuullarissumik sulisut siulersuisullu qanimut suleqatigisinnaanerannut periarfissaqarsimavunga – taamaasillunga suliffeqarfiup isumaanik, periarfissarissaarneranik ulluinnarnilu ingerlatsinermut ilisimasaqalersimasorujussuullunga. Kalaallit Nunatsinni kulturikkut kingorngutagut pingaartillugit Great Greenlandip ineriartorteqqinnissaa soqutigisarivara, akisussaaffeqarneq, pitsaassuseq ineriartornerlu ukkataralugit. Sulinerup nangeqqinnissaa qilanaaraara.
Aviaja Holm Jensenip sulinerup nangeqqinnissaani suliffeqarfiup pitsaasumik isigineqarnissaa, piniartullu oqaluttuaasa Great Greenlandillu nuna tamakkerlugu meqqiunera qitiutinneqarlutik inoqatinut attaveqaatikkut saqqumilaarnissaat pingaartippai
Siulersuisuni nikittoqartoq
Ataatsimeersuartoqarneranut atatillugu Pitsi Høegh siulersuisunut aamma siulittaasunngorpoq, Jørgen Aqe Møllerilu ilaasortanngorluni.
Tamatuma saniatigut Juliane Henningsen Heilmann siulittaasuujunnaarpoq, aamma Niels Boassen Louise Lynge Berthelsenilu siulersuisuniikkunnaarlutik.
