Great Greenland amigartooruteqartoq – missingersuutigineqartumiilli ikinnernik

- Ukiumut - 1.1 milliuunit koruuninik angusaqarneq missingersuutigineqartumit pitsaaneruvoq.

Great Greenland ukiumut nalunaarusiami taama allappoq.

Ammerivimmi 2,5 milliuunit koruuninik amigartooruteqarnissaq tunngavigalugu 2024-mut missingersuusiorpoq. Amerlanernik taperneqarnera naatsorsuutigisatut amigartooruteqannginnermut pissutaanerpaavoq.

Puisit amiinik amerlanerujussuarnik tunisisoqarsimasoq, Great Greenlandilu nioqqutissanik tuniniaanerulaarsimasoq, ukiumut nalunaarusiami atuarneqarsinnaavoq. Nuup mittarfissuartaani nioqqutissanik tuniniaaneq aallartilluarsimasoq ammerivik aamma allappoq.

Tamanna 14,4 milliuunit koruuninik kaaviiaartitaqarnermut pissutaaqataavoq, taamalu angusaqarneq pitsaasutut nalilerneqarluni.

Puisit amiinik tunitsivinnut tunisisoqarnerusimanera Great Greenlandip akiliisinnaassuseqarneranut unammillernartorqartitsisimavoq. Taamaammat ammerivik aningaasartuutiminik 2024-p affaata kingullermi ikilisaasariaqarsimavoq.

Aningaasat tigoriaannaat 2024-p naanerani 133.500 koruuninit amerlanerulaarput.

Ingerlatseqatigiiffiup nammineq pigisai taamani 22,5 milliuunit koruuniupput.

Aamma ukioq manna amigartooruteqassasorisut

Aamma 2025-mut naatsorsuutini amigartooruteqarnissaq naatsorsuutigineqartoq, ingerlatseqatigiiffiup siuttui allapput. Great Greenlandimi 1,3 milliuunit koruuninik amigartooruteqarnissamut missingersuusiorpoq.

Taamaammat ingerlatseqatigiiffik aningaasanik amerlanernik pisariaqartitsilluni piginnittuminut erseqqissaassuteqarpoq.

- Taamaammat aningaasanut tigoriaannarnut ukiumut naatsorsuuteqarfiusumut 2025-mut tapisinissaq pisariaqartinneqartoq nalilerneqarpoq, aamma ERP-systemimut nutaamut aningaasaliinissamut pisariaqartitsisoqarluni.

ERP-systemi tassaavoq, programmi ingerlatseqatigiiffiup naammassisaqarfiunerusumik pilersaarusiorsinnaatitsisussaq.

- Siuttut ingerlatsinerup ERP-systemimullu aningaasaliinissat pisariaqartut ukiut tulliuttut iluini aningaasalersornissaannut aningaaserivimmik Namminersorlutik Oqartussanillu oqaloqateqarput.

Great Greenland ukiuni sisamani sinneqartooreerluni siorna amigartooruteqarpoq. Ingerlatseqatigiiffiullu ingerlaannarnissaa pillugu nalorninartoqartoq ukiumut nalunaarusiami allaqqavoq.

- Ingerlatsinerup aningaasaliinerillu pisariaqartut ukiuni tullerni aningaasalersornissaannut neriorsuisoqarnissaa maanna nalunarpoq, kukkunersiuisoq ukiumut nalunaarusiami allappoq.

Nangillunili allappoq:

- Siuttulli neriorsorneqarnissaminnik angusaqassallutik nalilermassuk, ukiumut naatsorsuineq ingerlatseqatigiiffiup ingerlaannarnissaa aallaavigalugu suliarineqarpoq.

Namminersorlutik Oqartussanit ingerlatinneqartoq

Great Greenland Namminersorlutik Oqartussanit pigineqarpoq, ingerlaannarnissaanullu pisariaqartunik tapiiffigineqartarluni.

- Kiffartuussinissamut isumaqatigiissutit Great Greenland A/S-ip ingerlaannarnissaanut aalajangiisuulluinnarput, ingerlatseqatigiiffiup siuttui allapput. 

Aamma ukiut siuliini nalunaarusiani taama allaqqasoqartarpoq. Assersuutigalugu ukiumut 2021-mut nalunaarusiami ima allaqqavoq.

- Great Greenland A/S-ip kiffartuussinissamut isumaqatigiissutit pisariaqartittuassavai.

Ukiumut ataatsimut maanna isumaqatigiissuteqartarpoq. Great Greenlandili ukiunut arlalinnut kiffartuussinissamik isumaqatigiissuteqartarnissamik 2021-mut nalunaarusiami kissaateqarpoq.

- Puisit amiinik tunisineq pillugu kiffartuussinissamik ukiunut arlalinnut isumaqatigiissuteqartarnissaq pitsaasumik aaqqiinerussagaluarpoq. Taava amit pitsaanerunissaannut siunissamut ungasinnerusumut pilersaarusiortoqarsinnaassaaq. Taamaattoqassappat maskiinanut allanullu aningaasaliisoqarsinnaassagaluarpoq, ingerlatseqatigiiffiup siuttui 2021-mut nalunaarusiami allapput.