Puisit amiinut tapiissutit isumaqatigiissutigineqartut
Isumaqatigiinniarnerit akimmiffeqallattaareersut, Naalakkersuisut, Great Greenland A/S KNAPK-lu puisit amiinut tunitsiveqarnermut tapiissutit pillugit isumaqatigiissuteqarput.
Naalakkersuisut tusagassiuutinut nalunaarummi taama paasissutissiipput.
Ukiup nutaap aallartinneranit sapaatit akunneri marluk qaangiuttut isumaqatigiissuteqartoqarpoq – tamanna sioqqullugu puisit amii siornatulli akilersorneqarsimapput.
Tapiissutilli malunnaatilimmik qaffanneqarput, natsillu minnerit amiinut aki 48 koruunimik qaffappoq, natsit annerit amiinut aki 52 koruunimik qaffalluni, aatallu amiinut aki 70 koruunimik qaffalluni.
Isumaqatigiissullu illua tungeriit pingasuusut nuannaarutigaat.
KNAPK ima ilaatigut oqaaseqaateqarpoq:
- KNAPK-imiit 2024-mut tunisinermut akigititat, tapiissutit, bonusit aammalu tunitsiveqarnermut ilitsersuutit maannakkut kiisami inissitsillugit isumaqatiginninniutigineqareermata nuannaarutigaarput. Inernera kingusinaalaartumik inissikkaluartoq neriuutigaara inuussutissarsiutigalugu piniartut tamatumunnga isumakkeerfigisinnaagaatigut, tassami akigititat qaffallugit iluarsineqarmata.
- Piniarnermik inuussutissarsiorneq naluneqanngitsutut annertuumik tamaviaarfiuvoq, pingaartumik atuisartunut akigititat qaffakkiartuinnarneranni. Taamaattumik tunisinermut akigititat qaffallugit iluarsineqarnerat piniartorpassuarnut annertuumik iluaqutaasussaavoq.
Aamma Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisup, Naaja H. Nathanielsenip isumaqatigiissut iluarisimaarpaa:
- Isumaqatigiissut pingaaruteqartoq pitsaasorlu maannakkut isumaqatigiissutigineqarpoq. Isumaqatigiissuteqarnissap tungaanut oqaloqatigiinnermut peqataasut qutsavigaakka. Tamanna pilersitsiviulluartumik aammalu aaqqiissutissarsinissaq ukkataralugu ingerlanneqarsimavoq. Puisit amiinik tunisisarnerup siunissaa piniartunullu atugassarititaasut tamaviaarput aammalu silap pissusaata allanngoriartornera inuussutissarsiummut sunniivoq. Taamaattumik pisariaqartitsinerit pilertartut aamma pissusiviusut atukkagut, ukiuni makkunani sukkasuumik allanngortartut, pillugit oqaloqatigiinnerup attatiinnarnissaa pingaaruteqarpoq, Naaja Nathanielsen oqarpoq.
Ukioq naanerani 1 millionit koruuninik bonusimik akiliisoqarnissaa aamma isumaqatigiissutigineqarpoq.
