Kommune Qeqertaliup anguniagai: Attumi aalisartut atugassarititaat pitsaanerussapput
Kommune Qeqertalimmi kommunalbestyrelsit ullumi inissititerput. Kommunalbestyrelsilu pilersaaruteqarpoq: Tassa aalisartunut piniartunullu atugassarititaasut pitsaanerussasut.
- Qaqitsiviusinnaasut pitsanngorsarpagut tulleriiaaraluta. Taavalu aamma neqitsersuisarfinnut tunngasut aammalu pilattarfiusinnaasunik aamma pitsanngorsaassaagut. Taava tamatuma saniatigut ammeriveqarnermut tunngasunik aamma annertuunik pitsanngorsaaniarluta suliaqassagut, Borgmesteri, Inuit Ataqatigiinnit, Ane Hansen oqarpoq.
Inuit Ataqatiggit: Qulingiluanik qinigaatitaqarpoq.
Siumut: Sisamanik qinigaatitaqarpoq.
Demokraatit: Ataatsimik qinigaatitaqarput.
Atassut: Ataatsimik qinigaatitaqarpoq.
Ane Hansen borgmesterip allaffianniiginnarpoq. Taanna qinersinermi taaguunneqarnerpaat tulliulluni 387-init taaguuneqarpoq.
Kommunimi politikerit nunaqarfimmi Attumi 200-t missaanik najugaqarfiusumi aalisartunut piniartunullu atugassarititaasut pingaartumik pitsanngorsarniarpaat.
- Aasaq manna Attumiittoq aallartinneqartussaavoq. Taanna umiatsiarpassuarnik aqqusaarfiusarami avannaaniit kujataaniillu avannamukartunut, Ane Hansen oqarpoq.
Attumi umiatsianik qaqitsiviusinnaasunik umiatsialeriffeqalissaaq, puisillu amiinik aamma tigooraaveqalissalluni.
- Attormiut ukiorpassuarni angorusuttaramikkut amminik tigooraavimmik pitsaasumik peqalerumallutik. Taanna aamma sulissutigissavarput, iluatsinnissaata tungaanut, borgmesteri oqarpoq.
- Attormiut malugilluassavaat amutsiveqalernertik imaluunniit eqqussiffiusinnaasumik umiatsialeriffeqalernissartik taanna assorujussuaq ajunngitsumik malugusuutigussavaat.
Skilift og mere arbejdskraft
Suleqatigiinnissamut isumaqatigiissummi atsiorneqarsimasumi qulequttat 14-iupput: Sulisussaaleqinerlu taakku ilagaat. Taamaammat kommunimut qanoq iliornikkut sulisussarsisoqarsinnaanissaa politikerit misissorniarpaat.
Aammattaaq Qeqertartuarmi sisorarnermi majuartaateqalernissaa misissorniarneqarpoq. Tamanna kommuni Qaasuitsup Kommuniugallarmat misissorneqareernikuuvoq.
Qaasuitsup Kommunia 2018-imi januaarip ulluisa aallaqqaataani avinneqarpoq, tassanilu kommunit Kommune Qeqertalik aamma Avannaata Kommunia pilersinneqarlutik. Suleqatigiinnissamik isumaqatigiissut naapertorlugu sisorarnermi majuartaatiliortoqarsinnaanersoq misissorneqassaaq.
Kommune Qeqertalimmi illoqarfiit sisamaapput nunaqarfiillu arfineq-pingasuullutik.
