Puisit amii 2024-mi tunineqartut amerlanerujussuusut
Puisit amii ukioq kingulleq taamaasinerani 23.000-t tunineqarsimasut, ukioq manna 31.500-t tunineqarsimapput.
Ukioq kingullermiimmi puisit amiisa tunisaanerat 33%-imik qaffassimapput, tamannalu Great Greenlandip pisortaata, Preben Møllerip nuannaarutigaa.
- Kujataaniit Aasiaat tikillugu puisit amiisa tunisaaneri qaffariarsimapput, pisortaq oqarpoq.
Taassumalu tunisaqarnerulerneq marlunnik peqquteqarsoraa. Akit allanngorneri nunattalu kujataani sikorsuaqarnera.
- Siullermik aataat natsiillu amiisa akii qaffannikuupput.
- Nalunngisatsitut ukioq manna kujataani sikorsuaqaqaaq qaammatialunni ajornartorsiutaasunik, Canadamiillu puisit kimmut sineriak aqqusaarsimassavaat, taanna aamma peqqutaaqataasinnaavoq. Preben Møller oqarpoq.
Puisit amiisa siunissami amerlanerunissaat neriuutigigaa
Puisit amiinik tunisineq qaffariaraluartoq sulisut 26-usunit Great Greenlandimi sulisunik atorfinitsitsisoqarsimanngilaq.
- Amit amerleriarneri isumaqarpoq sulinerusariaqartugut, Preben Møller oqarpoq.
Great Greenlandimi puisit amiinit tunineqartunit aaqqatit, nasat aaqqatillu tunisassiarineqartarput.
Taamaammat aappaagu aamma taama tunisaqartoqartiginissaa pisortap neriuutigaa:
- Neriuutigaarput ukiup tulliani aamma taamak puiseqartigiumaartoq. Puisimmi amiisa pitsaassusaat qaffassappat amerpassuarnik suli pisariaqartitsivugut, taanna oqarpoq.
Great Greenland Naalakkersuisunit 13,9 millionit koruuninik aningaasaliiffigineqarpoq. Ukioq mannalu sullissinermut isumaqatigiissummit aqqutigalugu 3 millionit koruuninik aningaasaliisoqarluni.
