Ilinniartitsisoq Imak-ip isumaqatigiissutaa nutaaq pillugu: Neriuuteqarnartorujussuuvoq

Imak-imi ilaasortaq Ilulissanilu atuarfimmi Mathias Storchimi ilinniartitsisoq, Kirsten Lange Sandgreenip, isumaqatigiissut nutaaq iluarisimaarpaa.

Allattoq Jonna Enoksen Dahl

juunip 05-at 2026 07:31

Ilinniartitsisut meeqqat atuarfianeersut kattuffia, Imak, aamma Namminersorlutik Oqartussat nutaamik isumaqatiginninniareerlutik juunip ulluisa aallaqqaataani atsioqatigiipput.

Aamma atuaruk Isumaqatigiissut piareerpoq: Ilinniartitsisut akissarsiaat amerlineqarlutillu pikkorissarnissamut periarfissagissaarnerulersut

Isumaqatigiissut ilinniartitsisut akissarsiaat agguaqatigiisillugu 13 procentit missaannik amerlineqarnissaannik, ilinniaqqinnissamut pikkorissarnissamullu pitsaanerusumik periarfissii nissamik aamma isumaginninnermut aningaasaateqarfiliornissamik imaqarpoq.

Imak-imi ilaasortaq Ilulissanilu atuarfimmi Mathias Storchimi ilinniartitsisoq, Kirsten Lange Sandgreenip, isumaqatigiissut nutaaq iluarisimaarpaa.

-Una isumaqatigiinninniarneq ataatsimut isigalugu kusanartumik angusaqarfiusimasoq isumaqarpunga.

Pikkorissarnerit ilinniaqqinnerillu nukittorsarneqassasut

Isumaqatigiissut apriilip ulluisa aallaqqaataani 2025-miit marsip ulluisa 31-anut 2029-mut atuutissaaq.

Ilinniartitsisut isumaginninnermut aningaasaateqarfeqannginnerat aamma pikkorissartitsisarnerit ukiorpassuarni amigaataaneri Kirsten Lange Sandgreenip oqaatigaa, isumaqatigiissullu malillugu taakku ukkatarineqarnerulissammata isumalluarfigineqarput.

-Neriuuteqarnartorujussuuvoq, ulluinnarni sulinitsinnut atukkatsinnut pitsanngorsaatinik arlalinnik imaqarami, Kirsten Lange Sandgreen oqarpoq.

Imak-ip isumaqatigiissusiaa Imak-imi ilaasortanut sapaatip akunnerata tulliani saqqummiunneqassasoq, siulittaasup Elna Thomsen Heilmannip pilersaarutigaa.

Atuarfinni unammillernartut annertuut

Imak-ip politikerit iliuuseqannginnerat sakkortuumik maajip ulluisa arfineq pingajuanni KNR-imut isornartorsiorpaat. Meeqqat atuarfianni pitsaassuseq qulakkeerneqassappat, maannakkorpiaq iliuuseqartoqartariaqalerpoq.

Aamma atuaruk - Maanna iliuuseqartoqassaaq: Uninngasoqarnera ilinniartitsisussaaleqinerlu meeqqat atuarfiannut aarlerinartoq

- Ilinniartitsisussaaleqinermut atatillugu iliuuseqartoqarnissaa ukiuni arlalinni suaartaatigaarput. Tamannali tusaaniarneqarneq ajorpoq, Elna Thomsen Heilmann oqarpoq.

- Politikkerit siuliini tusarnaartoqaranilu tamanna iliuuseqarfigineqanngilaq.

Imak-imi siulittaasup Elna Thomsen Heilmann-ip oqaatigaa ullumikkut atuarfinni ilinniartitsisutut ilinniarsimanngitsut nalunaaquttap-akunneranut ilinniartitsisartut 200-t missaanniittut, kiisalu paarlattaasartut ilinniarsimanngitsut 200-t missaanniittut. Taakkua saniatigut nuna tamakkerlugu ilinniartitsisut ilinniarsimasut 900-t missaanniipput, ilinniartitsisullu 200-t amigaataallutik.

Elna Thomsen Heilmannip ilinniartitsisut ilinniarsimanngitsut 200-t missaanniittut vikarillu ilinniarsimanngitsut 200-t missaanniittut meeqqat atuarfianni ullumikkut atuartitsisartut oqaatigaa. Tamatuma saniatigut nunatsinni ilinniartitsisut ilinniarsimasut 900-t missaanniipput, ilinniartitsisullu 200-t amigaatigineqarput.

Ilinniartitsisussaaleqinerujussuup saniatigut pikkorissarnissamut ilinniaqqinnissamullu periarfissat pitsaanerusut, pingaartumik sulisut ilarpassuarisaannut ilinniarsimanngitsunut amigaataasut Imak-imi siulittaasup aamma erseqqissarpaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.