Isumaqatigiissut piareerpoq: Ilinniartitsisut akissarsiaat amerlineqarlutillu pikkorissarnissamut periarfissagissaarnerulersut

Ilinniartitsisut kattuffiat, IMAK, illuatungeriit isumaqatigiinniarneri ukiup ataatsip missaani unittooqqaareersullu ippassaq atsioqatigiillutik isumaqatigiissuteqarput. Tamannalu kattuffimmut oqiliallannarpoq.

Isumaqatigiinniarnerit inernerat ilaasortanut saqqummiunneqarnissaa tullinnguuppoq, isumaqatigiissullu tamatuma kingorna taasissutigineqassaaq. 

Isumaqatigiissutigineqartut naapertorlugit ilinniartitsisut tunngaviusumik akissarsiaat agguaqatigiissillugit 13 procentit missaannik amerlineqassapput. IMAK tamatuma saniatigut isumaginninnermut aningaasaateqarfiliorniarpoq, illuatungeriillu ilinniaqqittarnermut pikkorissaqqittarnermullu sulissutiginninnerunissartik isumaqatigiissutigaat. 
Isumaqatigiissut nutaaq ukiuni sisamani, apriilip aallaqqaataanit 2025-mit marsip 31-at 2029-p tungaanut atuutissaaq.

Pikkorissarnissamut periarfissagissaarnerulernissaq neriuutigigaa

IMAK-imi siulittaasup, Elna Thomsen Heilmannip, isumaqatigiissutip kommunit namminersorlutillu oqartussat pikkorissartarnerit ilinniagaqaqqittarnerillu aallarteqqinnissaannut pimoorussillutik sulissutiginninnissaannut aningaasaliissutinillu immikkoortitsinissaannut aqqutissiueqataanissaa neriuutigalugu KNR-imut oqarpoq.

Inuuniarnermi aningaasartuutit ilinniartitsisullu sulinerminni ilungersunartumik atugaqarneri qiviaraanni isumaqatigiissummik pitsaanerusumik angusaqartoqarsimasinnaanera siulittaasup nassuerutigaa. 

Siulersuisut tamanna kissaatigisimassagaluarpaat, taanna oqarpoq. 

- Nunatsinnili pissutsit atuuttut aningaasaqarnerpullu aallaavigalugit, isumaqarpugut angusarput naammagisimaartariaqaripput, Elna Thomsen Heilmann oqarpoq.

Isumaqatigiinniarnerullu inernera pitsanngorsaatinik allanik aamma imaqartoq, taakkualu ilaasortat ataatsimiitinneqalerpata tulleriiaarlugit misissorneqarumaartut, kattuffik Facebookimi allappoq. 

Atugassarititaasut naleqquttuunissaat pingaaruteqartoq

- Ilinniartitsisut akornanni ilaasortatta aamma IMAK-ip isumaqatigiissutaa naapertorlugu atorfeqartut akissarsiaasa atorfeqarnerallu naleqquttuunissaata sulissutigineqartuarnissaa pingaaruteqaqaaq. Ilinniartitaanerup pitsaassusaa ilinniartitsisutullu sulineq pilerinartuussappat, atugassarititaasut pitsaasuunissaat naleqqunnissaallu sulissutigisariaqarparput, Elna Thomsen Heilmann oqarpoq.

IMAK-ip isumaqatigiissut pillugu paasissutissat sukumiinerusut taasinerullu inernera piffissap sivikitsup ingerlanerani saqqummiussinnaassallugit naatsorsuutigaa.

Ilaasortat isumaqatigiissut taasissutigissagaat

Ilinniartitsineq pitsaanerpaasussatut kissaatigineqarpat ilinniartitsisut piginnaanngorsartariaqarput.

Ilinniartitsisut piginnaanngorsartinneqartariaqarput ilinniartitsissutigisartakkaminnullu tunngasunik qanittukkut ilinniaqqittariaqarlutik, IMAK-imi siulersuisuni siulittaasoq Elna Thomsen Heilmann oqarpoq.

Kattuffiup siulersuisunut saqqummiussassaminik piareersaavoq, tamannalu ilaasortanut, aamma sinerissamiittunut, saqqummiunneqassasoq taakkua allapput..

- Taava taasititsissutigissavarput, taasinerullu inernera saqqummiunneqarpat illuatungiliuttumut tunniunneqassaaq.

Kattuffiup sulisut sinniisaannut arlalinnut, Kommuneqarfik Sermersuumi atorfeqartunut, Kommuneqarfik Sermersuumi attaveqaatit ajutooqqanerat pissutigalugu attaveqarsinnaasimannginnertik aammattaaq ilisimatitsissutigaa.

Attavissaasinnaasut pillugit paasissutissaqalerpat sinniisut pineqartut attavigineqarumaartut, IMAK Facebookimi allappoq.