- Maanna iliuuseqartoqassaaq: Uninngasoqarnera ilinniartitsisussaaleqinerlu meeqqat atuarfiannut aarlerinartoq

Nunatsinni meeqqat atuarfianni arlaannik ataqatigiinngitsoqarpoq.

Ajornartorsiutaasup ajorluinnartumik kinguneqalinnginnerani aaqqiivigineqarnissaanut piffissaq ingerlalertupallappoq.

- Sineriak tamakkerlugu ilinniartitsisussaaleqivugut. Atuartitsinerup pitsaassusaanut soorunami sunniuteqarpoq, ilinniartitsisut peqatigiiffianni siulittaasoq, Elna Thomsen Heilmann, oqarpoq:

- Ilinniartitsisut 140-t missaanniittut ukiualunni tulliuttuni soraarninngussapput. Ilinniartitsisullu ilinniakkaminnik naammassisartut ukiumut 20-t missaanniillutik.

Meeqqat atuarfiat Inatsisartuni ukioq manna upernaakkut ataatsimiinnermi aamma oqaluuserineqarpoq.

Atuaqatigiit amerlanerpaamik 18-inik amerlassuseqartalernissananut aamma alloriarfinni pinngitsaaliissummik misilitsittarnerit atorunnaarsinneqarnissaannut nukarlernilu atuartut ikinnerusunik atuartitsissuteqarfigineqarnissaannut siunnersuutit oqaluuserineqarput.

Politikerilli IMAK-illu siunnersuutinut pitsaasunik isummersunngikkaluartut maannakkut arlaannik iliuuseqartoqassasoq, Elna Thomsen Heilmann oqarpoq:

- Atuarfimmut inatsit maanna atuuttoq malillugu atuartut skemaat ukiumullu akunnerit atuarfigisassaat meeqqallu atuarfianni naammassisassatut siunertat ilinniartitsisut amerlassusaallu ataqatigiinngillat.

- Iliuuseqartoqarnissaanut piffissanngorpoq, tamannalu pilertortumik torersumilli iliuuserineqassaaq.

Elna Thomsen Heilmannip ilinniartitsisut ilinniarsimanngitsut 200-t missaanniittut vikarillu ilinniarsimanngitsut 200-t missaanniittut meeqqat atuarfianni ullumikkut atuartitsisartut oqaatigaa. Tamatuma saniatigut nunatsinni ilinniartitsisut ilinniarsimasut 900-t missaanniipput.

- Meeqqat atuarfianni ilinniartitsisut 200-t maanna amigaatigineqarput, taanna oqarpoq.

Naalakkersuisunit iliuuseqartoqarnissaa amigaataasoq

Elna Thomsen Heilmannip naalakkersuisut siulii nersualaarpallaanngilai.

- Ilinniartitsisussaaleqinermut atatillugu iliuuseqartoqarnissaa ukiuni arlalinni suaartaatigaarput. Tamannali tusaaniarneqarneq ajorpoq, Elna Thomsen Heilmann oqarpoq.

- Politikkerit siuliini tusarnaartoqaranilu tamanna iliuuseqarfigineqanngilaq.

Inatsisartut atuaqatigiit amerlanerpaamik 18-iulernissaannut aamma alloriarfinni misilitsittarnerit atorunnaarsinneqarnissaannut siunnersuutit ataasinngormat oqallisigimmatigit arlaatigut iliuuseqartoqarnissaa isumaqatigiissutigineqangaatsiarpoq.

- Meeqqat atuarfiannut tunngatillugu inatsimmi sinaakkutit (ukiut 24-t matuma siornatut aaqq.) suli taamaapput, taamaammat aaqqiissuteqarnissamut naleqqussaanissamullu piffissanngorpoq, ilinniartitaanermut naalakkersuisoq, Nivi Olsen (D) oqaaseqartarfimmit oqarpoq.

Elna Thomsen Heilmannillu naalakkersuisut suliassaqarfimmik aallartitsilluarsorai:

- Neriunartutut isikkoqarpoq, kisianni oqaatsit iliuuseqarfigineqassanersut apeqqutaavoq.

Elna Thomsen Heilmannip atuaqatigiit amerlanerpaamik 18-iulernissaannut siunnersuut isumaqatiginngilaa.

- Ilinniartitsisut naammakkaluarpata siunnersuut ajussanngikkaluarpoq. Kisianni atuaqatigiit amerlassusaat 18-inut maannakkut allanngortinneqassaguni ilinniartitsisut tamarmik Nuummut nuussapput, tamannalu sinerissami tamarmi ilinniartitsisussaaleqiffioreersumut sunniuteqassaaq. Taamaammat siunnersuut taanna ernumassutigaarput, Elna Thomsen Heilmann oqarpoq.

IMAK-ip alloriarfinni misilitsinnerit ikilisinneqarnissaa atorunnaarsinneqarnissaalluunniit aamma nukarlerni atuartunut atuartitsissutit ikinnerulersinneqarnissaat taperserpaa.

Ilungersuuterpassuaqarlutik sukataaruteqartut qasullutillu

Naalakkersuisut meeqqat atuarfianni allannguinissamik misissuisussanik, qitiusumik soqutigisaqartunik suleqatigiissitaliortoqarnissaa siunnersuutigaat.

Elna Thomsen Heilmannillu isumassarsiaq tamanna illuatungaani qularutigilluinnarpaa. Qinigaaffimmi kingullermi suleqatigiissitamik pilersitsisoqarnerani susoqarsimannginnera taassuma malinnaaffigaa.

Illuatungaanili angajoqqaanit tusagaqarnissani amigaatigisoralugu taakku meeqqat atuarfiata ineriartortinneqarnissaanut sinniisuutikkusuppai.

- Ilinniartitsisut ullumikkut ilungersuutigisarpassuaqarlutillu sukataaruteqarput, qasullutillu. Inoqatinut attaveqaatit atuartut atugarissaarnerannut, ukkatarinnissinnaanerannut sinittarnerannullu sunniuteqarput, angajoqqaallu tassunga aamma peqataatinneqartariaqarput, IMAK-imi siulittaasoq, Elna Thomsen Heilmann, oqarpoq.

Ilinniartitsisussaaleqinerujussuup saniatigut pikkorissarnissamut ilinniaqqinnissamullu periarfissat pitsaanerusut, pingaartumik sulisut ilarpassuarisaannut ilinniarsimanngitsunut amigaataasut IMAK-imi siulittaasup oqaatigaa.

Elna Thomsen Heilmannip meeqqat atuarfiata allanngortinneqarnissaanut Inatsisartunit siunnersuutit nukarlerni atuartunut tunnganerusut aamma oqaatigaa.

- Akullernili atuartunut aamma iliuuseqartoqassaaq. Meeqqat atuarfiat tamarmi aaqqissuuteqqinneqassaaq, taanna oqarpoq.

Atuaqatigiit amerlanerpaamik 18-iunissaannut aamma alloriarfinni misilitsittarnerit atorunnaarsinneqarnissaannut inatsisissatut siunnersuutit maajip aqqaneq-aappaanni aappassaaneerneqassapput.