Peqqinnissaqarfiup eqqiaasut arfineq-pingasut soraarsinneqarneranni isornartorsiuineq itigartitsissutigigaa

Dronning Ingridip Napparsimmavissuani eqqiaasut arfineq-pingasut maajip 29-anni soraarsinneqarput.

Suliffeqarfiup avataaneersup eqqiaanermi suliassat ilarujussuanik suliaqartalernissaa tunngavilersuutigineqarpoq.

Soraarsinneqartut ilaata, Laura Frederiksenip soraarsinneqarnissaminnut allakkamut akissuteqarnissamut sapaatip akunneranik periarfissinneqarsimallutik aamma sulisitsisut sinniisaannik ataatsimeeqateqarsimanatik soraarsinneqarnissaminnullu nassuiaateqarfigineqarsimanatik, KNR-imut oqaatigaa.

KNR Kalaallit Nunaanni Peqqinnissaqarfimmit oqaaseqaammit maanna tigusaqarpoq.

Peqqinnissaqarfiup soraarsitsinerit nunatsinni napparsimmavissuarmi eqqiaanermik suliaqarfimmi pisariaqartumik aaqqissuusseqqittoqarnerata angisuup malitsigaat allappaa.

Soraarsitsinerit 'aaqqissuussaanikkut allannguinerup toqqaannartumik kingunerigai', Peqqinnissaqarfiup allappaa, tamannalu sulisunut ataasiakkaanut pissutsinut tunngassuteqanngitsoq erseqqissaatigaa.

Eqqiaanermi suliassat avataaneersunut suliassanngortinniarlugit aalajangeraat

Eqqiaanermi suliassat – tassa DIH-mi ataatsimoorfinnik, napparsimasunut akunnittarfinnik kiisalu allaffinnik kiffartuussiviillu aalajangersimasunik eqqiaanerit– nunatsinni suliariumannittussarsiuussisarnermut inatsisit atuuttut malillugit 2025-mi decembarimi suliariumannittussarsiuunneqartut, Peqqinnissaqarfik allappoq.

Suliassat peqqinnissaqarfimmi sulisunit suliffeqarfimmiillu avataaneersunit suliarineqartalissasut paasissutissiissutigaat. Suliassat 'patajaatsumik, nikerarsinnaasumik, pitsaassutsimillu naammaginartumik suliarineqarsinnaanissaat' pillugu allannguuteqarfigineqarput.

Sulisut ataatsimiinnermi paasissutissiiffigineqartut

Peqqinnissaqarfiup sulisut aaqqissuusseqqinnissamut sulisussanillu toqqaanissamut ingerlatsinermut tunngatillugu paasissutissiiffigineqarlutillu tunngavilersuuteqarfigineqarsimanerarpai.

Peqqinnissaqarfiup oqarnera naapertorlugu sulisut eqqiaanermi suliassat ilaannik suliariumannittussarsiuussinermut tunngavimmik aamma suliassaqarfimmi ingerlatsinermi nikerarsinnaanermilu ilungersunartut aamma aalajangiinissamut suliaqarnermi piumasaqaatigineqartut ingerlaqqittoqarnissaalu, matumani illuatungerisamik tusarniaanerit pillugit maajip arfineq-aappaani ataatsimiinnermi paasissutissiiffigineqarput.

Laura Frederiksenip maajip arfineq-aappaani paasissutissiinermi ataatsimiittoqarnera KNR-imut uppernarsarpaa.

Tassa sulisut soraarsitsinialikkersaartoqarneranik ilimasaarutigineqarfigineqarnerat aamma oqaaseqaateqarnissamut periarfissaqarnerat.

Peqqinnissaqarfiup oqarnera naapertorlugu sulisut tamarmik immikkut tusarniaaffigineqarput, tassa soraarsinneqarnissaminnut oqaaseqaateqarnissamut periarfissaqarsimapput.

Allakkatigut paasissutissiineq

Sulisullu peqqinnissaqarfiup oqarnera naapertorlugu tusarniaanermut atatillugu soraarsitsinissamut tunngavilersuummik allakkatigut tunniussiffigineqarput.

Sulisunit kikkut soraarsinneqarnissaannik toqqaaniarnermi suliatigut inuttullu piginnaasat, aalajaassuseq kiisalu atorfeqarnerup sivisussusaanik tunngavigineqartut, Peqqinnissaqarfiup allappaa.

Peqqinnissaqarfiulli soraarsitsineq aaqqissuusseqqinnerup kinguneranik suliassat ikilinerannik tunngaveqartoq – sulisullu ataasiakkaat sulinerisa pitsaassusaannik tunngaveqanngitsoq aamma allappaa.

Sulisut sapaatip akunnerinnaanik periarfissaqarlutik nalunaarfigineqarsimanerannut tunngatillugu Peqqinnissaqarfiup soraarsitsinerit ingerlatsinermi matumani tusarniaaneq ilimasaaruteqarnerlu pillugit malittarisassat atuuttut naapertorlugit pisimanerarpaa.

- Sulisut aalajangiisoqavinnginnerani akililiissuteqarnissaminnut periarfissaqartinneqarput, Peqqinnissaqarfik allappoq.

Ingerlatsinermi ataatsimoortumik piffissaliussap sukannersup iluani ingerlatsisoqartoq tamatumalu saniatigut malittarisassat pisinnaatitaaffiillu malinneqartut peqqinnissaqarfiup oqaatigaa.

Aaqqissuusseqqinnerup nutaap ilaa avataanit suliaqartartumut juunip aallaqqaataat 2026-mi tunniunneqartussaaneranik tamanna pissuteqarpoq.

- Qullersaqarfiup naliliinera naapertorlugu ingerlatsineq tunngavissaqarluartumik uppernarsaatinillu tunngaviliisumik malittarisassanillu atuuttunik naapertuinermi ingerlanneqarpoq, Peqqinnissaqarfik naggasiutigalugu allappoq.

Laura Frederiksenip sulisut peqatigiiffiat suliamut akuliuttoq aamma peqqinnissamut naalakkersuisup Anna Wangenheimip suliamik misissuineq aallartinneqartoq paasissutissiissutigigaa KNR-imut oqaatigaa.