Pars: Ilisimatusarfimmi ilinniartut oqaatsitsigut ajornartorsiortut amerliartortut
Ilinniartut ilinniarnissaminnut piareersimalluartut amerlisarniarlugit atuarunnaartullu ikilisinniarlugit Ilisimatusarfimmi piumasaqaatit sukaterneqarput. Ilisimatusarfiup ilinniartitsinermi fagini oqaatsit atorneqartussat pingaartinnerussagai Ilaqutariinnermut, Naligiissitaanermut Isumaginninnermullu naalakkersuisoq isumaqarpoq.
Kalaallisuugaluarpat, qallunaatuugaluarpat tuluttuugaluarpalluunniit oqaatsitsigut unammillernartoqartoq, Tine Parsip oqaatigaa.
- Ilinniartitsineq paasinaraangat ilikkagaqarnarnerpaasarpoq. Ilinniartorpassuillu oqaatsitsigut ajornartorsiuleraluttuinnartut misigaarput. Qallunaatut tuluttullu pineqarput aammali kalaallisut.
Aamma atuaruk Martha Lund Olsenip ilisimatusarfimmi piumasaqaatit sukaterneqarneri isornartorsiorpai
Aamma atuaruk Ilinniakkaminnik naammassinnittartut amerlinissaat sukaterinikkut qulakkeerniarneqartoq
- Ilinniartitsinermi oqaatsit isumaat eqqartorusuppara oqallitsitsinissamullu aallarniiniarlunga – Ilisimatusarfiullu sulisui peqatigalugit:
- Marlunnit ilinniartitsisulerluni ilisimatusarfimmi ilinniartitsisarnissamik aaqqissuissuugut? Pitsaassuseq naammassisarnerlu qaffassava? Ilinniarfiit sorliit tamanna amigaatigaat? Aningaasassaqarpalu? Ilisimatusarfiup nittartagaanni rektori, Tine Pars, isummersorluni aperivoq.
Isumaginninnermut siunnersortinngornialernissamut piumasaqaatit sukaterneqarnerat isumaqarpoq, ilinniarlertussat ukiunik pingasunik sivisissusilimmik ilinniarnertuunngorniatut naammassisimassasut piumasaqaataalermat. Kalaallisut qallunaatullu A-niveaumi miinnerpaamik C-rsimassasut, tuluttullu B-niveaumi minnerpaamik D-rsimassasut piumasaqaataalerluni.
Isumaginninnermut siunnersortinngorniarneq ilimmarfimmut 2007-mi ilanngunneqarpoq.
