Isumaginninnermut ministeri Ivana Nikoline Brønlundimut suliamut atatillugu aalajangiinermut allannguinermut qisuariartoq

Danskit isumaginninnermut ministeriata, Sophie Hæstorp Andersenip kommunit kalaallit meerartaat pillugit angerlarsimaffiup avataanut inissiinermi suliani malittarisassaat pillugit erseqqissaaqqippoq.

Allattoq Ann-Sophie Greve Møller

septembarip 23-at 2025 10:52

Nutserisoq Connie Fontain

Høje-Taastrup Kommuniata inatsisit Folketingimi akuerineqartunik malinninnginnera ajornartorsiutaalluinnarpoq. Danskit isumaginninnermut ministeriat kommunip pinngitsaaliissummik inissiinerata maanna allanngortinneqarnerata kingorna oqarpoq.

Suliaq kalaallimut Ivana Nikoline Brønlundimut paniminik inunngorlaamik erninermi kingorna akunneq ataaseq qaangiutiinnartoq pinngitsaaliissummik arsaarneqartumut tunngassuteqarpoq. Aalajangerneq tamanna Høje-Taastrup Kommuniata qaammat ataaseq sioqqullugu aalajangigaraa.

- Høje-Taastrup Kommuniata inatsisinik Folketingimi akuerisatsinnik malinninnginnera ajornartorsiutaalluinnartoq isumaqarpunga. Ilungersunarluinnartumik kukkusoqarpoq, kommunillu una tunngavigalugu suliat tamarmik misissoqqissaarlugillu inatsisit suliani ukunani malinneqarnissaat qulakkeersimagai paasivara, Sophie Hæstorp Andersen allakkatigut akissummi oqarpoq.

Malittarisassat erseqqissaatigeqqikkai

Aviaja-Luunap pinngitsaaliissummik inisinneqarnissaanut misissuutit angajoqqaat piginnaasaannik misissuinermut (FKU) tunngaveqartut arlallit atorneqarsimapput.

Kommunimmi Ivana Nikoline Brønlund nunatsinni inunngorlunilu kalaallisut tunuliaqutaqaraluartoq tassunga tunngatillugu suliaq inatsimmut maajip aallaqqaataani atuutilersumut ilaanngitsutut nalilerpaa.

ANGAJOQQAAT KALAALLIT MEERARTAASA ALLAMUT INISSINNEQARATARSINNAANERANNIK DANMARKIMI KOMMUNIT NALILEERIAASIISA ISORNARTORSIORNEQARNERAT NAATSUMIK

Ilaqutariit kalaallit Danmarkimiittut meerartaat allamut inissitat ilaqutariit qallunaat meerartaasa allamut inissitaasut tallimariaatigaat, VIVE (Det Nationale Forsknings- og Analysecenter for Velfærd i Danmark) nalunaarusiamini 2022-meersumi allappoq.
Danmarkimi kommunit isumaginnittoqarfiini kalaallit meerartaasa allammut inissinneqaratarsinnaanerannik suliat kalaallit kulturiannik oqaasiinillu eqqarsaatiginninnani suliaasut taamaannerallu kalaallit angjoqqaat paatsoorneqarnerannik taakkualu pigiliutiinnakkanik isumaqarfigineqarnerannik kinguneqarsinnaasut, VIVE-p nalunaarusiamini 2023-meersumi allappoq.
Kalaallit angajoqqaat meeraasa allamut inissinneqaratarsinnaanerannik Danmarkimi kommunit angajoqqaat piginnaasaannik nalileeriaasii (FKU) aamma isornartorsiorneqarput. Nalileeriaatsit taakkua nunani killerneersut kulturiannut ileqquinullu naleqqussaagaanerat isornartorsiorneqarnerinut tunngavilersuutigineqarpoq.
Naalagaaffik marsimi 2023-mi ukiuni pingasuni agguarlugit atugassatut 7,8 millionit koruuninik Danmarkimi kalaallit meerartaannik allamut inissiinissamik nalilersuiniarnermi angajoqqaat kulturiat oqaasiilu eqqarsaatigalugit apersorneqartarnissaannut taamaaliornermullu nutaanik najoqqutassiornissamut illikartitsivoq.
Tamanna Folketingimi ilaasortat nunatsinneersut marluk, IA-meersup Aaja Chemnitzip aamma Naleqqameersup Aki-Matilda Høegh-Damip, Folketingimi nalilersueriaatsinut nutaanut aningaasanik piumasaqaateqarlutik isumaqatigiinniutigineqareernerisa kingorna pipput.
Inatsit naammagittaalliuutigisaat maajip aallaqqaataani 2025-mi atuutilerpoq, kalaallit meerartaannik angerlarsimaffiup avataanut inissiinerni suliani, kalaallit oqaasiinik kulturiannillu immikkut ilisimasalimmit, immikkoortortaqarfimmit immikkut ittumit VISO-meersumit suliarineqartartussanngorlugit qallunaat kommunii pisusanngortinneqarput. Taakku FKU-mik isornartorsiorneqartunik taarsiisuussapput.
Tamatumunnga ilanngullugu FKU atorlugu angerlarsimaffiup avataanut inissiinerit suli ingerlanneqartut immikkoortup misissuiffigissavai.

Allisiguk

Inatsit naapertorlugu kommunit Danmarkimi kalaallit meerartaannik angerlarsimaffiup avataanut inissiinissamut suliani immikkut siunnersuinermik suliffeqarfimmik, VISO-mik kalaallit piorsarsimassusiannik oqaasiinillu immikkut ittumik ilisimasalimmik suleqateqartussaapput. Angajoqqaat piginnaasaannik misissuutit isornartorsiorneqangaatsiartut atorneqaratik taanna suleqatigisussaavaa.

Naammagittaalliuteqartarfiup pinngitsaaliissummik inissiineq pillugu aalajangerneq allanngortinniarlugu ataasinngormat aalajangerpaa. Ivana Nikoline Brønlund paninilu anaanap-meeqqallu angerlarsimaffiannut maanna inissinneqartussanngorput, tassanilu imminnut ilinniassasut, KNR-ip paasivaa.

Isumaginninnermut ministeri oqaqqippoq:

- Ilaqutariit kalaallisut tunuliaqutaqartut inatsisip malinneqarnissaa toqqissisimaffigisinnaassavaat. Taamaammat aammaarlunga malittarisassat kommuninut tamanut erseqqissaateqqissavakka, ilaqutariillu kalaallisut tunuliaqutaqartut pillugit inissiinermi suliani misissuutinik atuisoqannginnissaa sakkortunerpaamik erseqqissassallugu, Sophie Hæstorp Andersen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.