Ivana Nikoline Brønlund panimminik pinngitsaaliissummik arsaarneqarnermini suliami ajugaasoq

Høje-Taastrup Kommuneata Ivana Nikoline Brønlundip paniata pinngitsaaliissummik arsaarinnissutigineqarnissaanut aalajangiinera, Danmarkimi maalaaruteqartarnermut aqutsisoqarfiup Ankestyrelsep allanngortissallugu aalajangerpaa, tamanna kommunip inatsimmik unioqqutitsineranik suliamilu kukkusimaneranik saqqummiussisoqarnerata kingorna pivoq.

Allattoq Birgitte Kjeldsen

septembarip 22-at 2025 17:06

Nutserisoq Karla Heilmann

Ivana Nikoline Brønlundip panianik pinngitsaaliilluni arsaarinnissutigineqarnera pillugu suliaq Danmarkimi naammagittaalliortarfimmi Ankestyrelsemi qaammat una ingerlanneqarpoq. Høje-Taastrup Kommunep pinngitsaaliissummik arsaarinninneq pillugu aalajangiinera allanngortissallugu Naammagittaalliortarfik maanna aalajangiivoq.

Taamak kommune nittartakkamini allappoq.

- Naak suliaq sammineqangaatsiaraluartoq, tusagassiutillu annikitsualuinnaat paasissutissiissutigigaluaraat suli nipangiusimasussaatitaavugut, taamaalilluta suliami erseqqissumik qanoq pisoqarnissaa iluamik oqaatigisinnaanngilarput. Taamaallaat meeraaqqap ilaqutaanullu tapersersuinissarput oqaatigisinnaavarput, taamak Høje-Taastrup Kommunemi meeqqanut- inuusuttunullu pisortaq Anya Krogh Manghezi tusagassiutinut nalunaarummi allappoq.

Ivana Nikoline Brønlundi panimi angerlarnissaa qilanaaralugu Facebookimi nammineq allappoq.

Aamma atuarukIvana Nikoline Brønlund pinngitsaaliissummik paniminik arsaarneqarpoq. Maanna suliaq politikkikkut sammineqalerpoq

Pania Aviaja-Luuna pinngitsaaliissummik aggustip aqqarnganni arsaarinnissutigineqarpoq – inunngorneraniit nalunaaquttap akunnera ataaseq qaangiutiinnartoq.

Høje-Taastrup Kommuneta pania pinngitsaaliissummik arsaarinnissutaassasoq qaammat sioqqullugu aalajangiussimavaa. Tamanna angajoqqaatut piginnaasanik nalilersuinermut atorneqartartut isornartorsiorneqangaatsiartup nalilersueriaatsit FKU-t (angajoqqaatut piginnaasanik misilitsinnerit) tunngavigalugit aalajangiiffigaat.

Suliaq politikkikkut sammineqangaatsiarpoq, tassami FKU-mik misissueriaatsit ukiorpaalunni isornartorsiorneqangaatsiarnerisa kingorna, Danmarkimi inatsit nutaaq maajimi atuutilersoq pissutigalugu. Kommunit kalaallit meerartaannik angerlarsimaffiup avataanut inissiinerni suliani, kalaallit kulturiannik oqaasiinillu immikkut ilisimasalimmik peqataatitsisassasut inatsimmi nutaami allaqqavoq.

ANGAJOQQAAT KALAALLIT MEERARTAASA ALLAMUT INISSINNEQARATARSINNAANERANNIK DANMARKIMI KOMMUNIT NALILEERIAASIISA ISORNARTORSIORNEQARNERAT NAATSUMIK

Ilaqutariit kalaallit Danmarkimiittut meerartaat allamut inissitat ilaqutariit qallunaat meerartaasa allamut inissitaasut tallimariaatigaat, VIVE (Det Nationale Forsknings- og Analysecenter for Velfærd i Danmark) nalunaarusiamini 2022-meersumi allappoq.
Danmarkimi kommunit isumaginnittoqarfiini kalaallit meerartaasa allammut inissinneqaratarsinnaanerannik suliat kalaallit kulturiannik oqaasiinillu eqqarsaatiginninnani suliaasut taamaannerallu kalaallit angjoqqaat paatsoorneqarnerannik taakkualu pigiliutiinnakkanik isumaqarfigineqarnerannik kinguneqarsinnaasut, VIVE-p nalunaarusiamini 2023-meersumi allappoq.
Kalaallit angajoqqaat meeraasa allamut inissinneqaratarsinnaanerannik Danmarkimi kommunit angajoqqaat piginnaasaannik nalileeriaasii (FKU) aamma isornartorsiorneqarput. Nalileeriaatsit taakkua nunani killerneersut kulturiannut ileqquinullu naleqqussaagaanerat isornartorsiorneqarnerinut tunngavilersuutigineqarpoq.
Naalagaaffik marsimi 2023-mi ukiuni pingasuni agguarlugit atugassatut 7,8 millionit koruuninik Danmarkimi kalaallit meerartaannik allamut inissiinissamik nalilersuiniarnermi angajoqqaat kulturiat oqaasiilu eqqarsaatigalugit apersorneqartarnissaannut taamaaliornermullu nutaanik najoqqutassiornissamut illikartitsivoq.
Tamanna Folketingimi ilaasortat nunatsinneersut marluk, IA-meersup Aaja Chemnitzip aamma Naleqqameersup Aki-Matilda Høegh-Damip, Folketingimi nalilersueriaatsinut nutaanut aningaasanik piumasaqaateqarlutik isumaqatigiinniutigineqareernerisa kingorna pipput.
Inatsit naammagittaalliuutigisaat maajip aallaqqaataani 2025-mi atuutilerpoq, kalaallit meerartaannik angerlarsimaffiup avataanut inissiinerni suliani, kalaallit oqaasiinik kulturiannillu immikkut ilisimasalimmit, immikkoortortaqarfimmit immikkut ittumit VISO-meersumit suliarineqartartussanngorlugit qallunaat kommunii pisusanngortinneqarput. Taakku FKU-mik isornartorsiorneqartunik taarsiisuussapput.
Tamatumunnga ilanngullugu FKU atorlugu angerlarsimaffiup avataanut inissiinerit suli ingerlanneqartut immikkoortup misissuiffigissavai.

Allisiguk

Taamaakkaluartoq Ivana Nikoline Brønlundip angajoqqaatut piginnaasanik misilitsinnerit arlalissuit aqqusaarpai. Tamannalu kukkunerusoq kommunep nammineerluni kingornatigut oqaatigaa.

Aamma danskit isumaginninnermut ministeriata Sophie Hæstorp Andersenip pisoq isornartorsiorpaa.

Suliaq taamanili Danmarkimi Naammagittaalliortarfimmut saqqummiunneqarpoq, kommunellu pinngitsaaliissummik arsaarinninnermut aalajangiinera Naammagittaalliortarfiut maanna allanngortereerpaa.

Aamma atuarukDanskit inatsisaat nutaaq atuutilereeraluartoq, pinngitsaaliissummik inissiinernut akerliusoqarunnaanngilaq

Kalaallit meerartaannik angerlarsimaffiup avataanut inissiinerni suliat pineqartillugit, suliap matuma suleriaasiannut allannguisuusoq, Høje-Taastrup Kommune tusagassiutinut nalunaarummi allappoq.

- Høje-Taastrup Kommune suliaq pineqartoq pissutigalugu aaqqissuussamik suleriaaseqalerpoq innuttaasulli Kalaallit Nunaannut atuumassuteqarsinnanissaanik aperinissamik qulakkeerinneriaaseqalerluni. Taamaaliornikkut VISO kalaallini ilaqutariinni meeqqanik inuusuttunillu allamut inisseeratarsinnaanermut tunngasuni eqqortumik akuutinneqartalissaaq, kommuni allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.