Kunngi Frederik Nunatsinnut sapaatip-akunnerani matumani tikeraassasoq

Ataqqinartorsuaq Kunngi Frederik Nuummut pingasunngornermi februaarip 18-ianni tikissaaq. 

Kunngi Naalakkersuisut siulittaasuannit Jens-Frederik Nielsenimit (D) aamma Inatsisartut siulittaasuannit Kim Kielsenimit (S) mittarfimmi tikilluaqquneqassaaq.

Kunngi pingasunngorneq ulloq tamaat Nuummiissaaq. Kunngikkormiut tusagassiuutinut nalunaarummi paasissutissiipput.

Nuummi sunerpiaq pilersaaruteqartoqarnersoq suli nalunarpoq, paasissutissalli arlallit tamanut saqqummiunneqarnissaat sapaatip-akunnerani matumani naatsorsuutigineqarpoq.

Kalaallit Nunaata kitaata sineriaani, Nuummiit 140 kilometerinik avannarpasinnerusumut Maniitsumut tikeraarnissi sisamanngorpat naatsorsuutigaa. 

Kangerlussuarmut ingerlaqqilluni ulloq naggasissavaa. Kangerlussuarmi Issittumi tunngaviusumik ilinniarfik – sakkutuutut ilinniarfik qaammatinik arfinilinnik sivisussuseqartoq, siorna majimi ammartoq - tallimanngornermi pulaassavaa.

Inuiaat kalaallit misiginneqatigigai

Tikeraarnissaq, Kunngi Dronningilu Litauenimi naalagaaffimmit tikeraarneranni qaammat kingulleq saqqummiunneqarpoq. Inuiaat kalaallit “naligalugit” naapinnissaat qilanaaralugu, tusagassiortunut sassarnermini oqarpoq.

- Kalaallit misiginneqatigingaatsiarpagut, Kalaallit Nunaannilu sapaatip-akunnerini kingullerni pisut attortissutigingaatsiarpagut, oqarpoq.

Kalaallit Nunaanni nunap immikkoortui soqutigineqalingaatsiarneranni Kunngi tikeraartussanngorpoq.

USA-p præsidentiata Donald Trumpip Kalaallit Nunaata oqartussaassuseqarneranut qaammaterpaalunni sioorasaarivoq, Kunngeqarfiullu Danmarkip Issittumi qeqertamik illersuinera, USA-p sillimaniarnermut politikikkut pingaarutilerujussuaq, pillugu isornartorsiorlugu.

Kunngi Frederik Kalaallit Nunaannut qanittumik ukiorpassuarni atassuteqarpoq, nunalu arlaleriarluni tikeraartarpaa. Tikeraartarnermini inuiaqatigiinnut kulturimullu qanittumik atassuteqarneq ineriartortittarpaa. 

Kalaallit Nunaanni qaammat kingulleq ilungersunartorsiornerpaaffianiinneraniit siullermeerluni tikeraalerpoq.