Kalaallit danskillu naalagaaffimmi atorfillit naligiissitaalertut
Kalaallit pineqaatissinneqarsimasunut inissiisarfimmi nakkutilliisut, politiit, eqqartuussivinni sulisut allallu danskit naalagaaffiani atorfiliusut, Danmarkimi suleqataallu naligiissitaannginnerat KNR-ip allaaserereerpaa.
Tamannali allanngortussanngorpoq.
Naalagaaffimmi atorfillit 230-t aningaasarsiamikkut atorfinitsitsinermilu atugassarititaasut Danmarkimitulli naligiissitaalertut, Aningaasaqarnermut ministeria tusagassiuutinut nalunaarummi paasititsivoq.
- Isumaqatigiissuteqarnermi Kalaallit Nunaanni naalagaaffimmi atorfillit nalinginnaasumik akissarsiaqarnerulerlutillu sulinikinnerulernissaat anguneqarpoq. Kalaallit Nunaanni naalagaaffimmi atorfillit ernereernermi sulinngiffeqarnermi atugassarititanut, soraarnerussutisianut sulisunut utoqqaliarsaartunut aaqqissuussinernut pitsanngorsaanerit aamma malugissavaat, Aningaasaqarnermut ministeriaqarfik paasititsivoq.
Aningaasaqarnermut Akileraartarnermullu Naalakkersuisoq Múte B. Egedep ullormut nutaarsiassaq ‘alloriarneq pingaarutilittut’ taavaa.
- Kalaallit Nunaanni naalagaaffimmi atorfilinnut atugassarititaasut Danmarkimi naalagaaffimmut atorfilinnut atuuttunut naligiissitaalernerat alloriarneruvoq pingaarutilik, nangilluni oqarpoq:
Soraarnerussutisiat ilaanngitsut
Naligiimmik atugassaqartitsinissamut isumaqatiginninniarnerit qanoq unitsinneqarluinnarsimanerat KNR-ip 2022-mi nassuiaatigaa.
Danskilli naalakkersuisuisa atugassarititaasunik naligiissitsiniarlutik ukioq ataaseq qaangiutiinnartoq aalajangerpaat.
Aalajangernerlu tamanna maanna piviusunngortinneqarpoq.
Aningaasaqarnermut ministereqarfiulli naligiissitsisoqasilernissaanut suli suliassaqartoq tusagassiuutinut nalunaarummi paasissutissiissutigaa: Soraarnerussutisiassanummi tunngasut naligiissitsinermut suli ilanngunneqanngillat.
Múte B. Egedep soraarnerussutisianik naligiissitsisoqarnissaa alloriarnerup tullerissagaa tusagassiuutinut nalunaarummi aamma paasissutissiissutigaa:
- Naalagaaffimmi tjenestemanditut aamma isumaqatigiissutit malillugit atorfeqartut; minnerunngitsumillu tjenestemandit soraarninngoreersimasut naligiissitsivigineqarnissaannut suliaq nanginneqassaaq. Suliassaq tamanna aamma qilanaaraarput.
Aasaanerani sulinngiffeqarnerup kingorna oqaloqatigiissasut
Nunatsinni ilinniartitsisut soraarninngoreersimasut Danmarkimut nuukkunik 10.000 koruuninik aningaasassaqarnerulissasut KNR-ip siornaak allaaseraa.
Namminersorlutik Oqartussat aamma Sulisoqarnermut Piginnaasaqarnermullu Aqutsisoqarfiup soraarnerussutisiat pillugit oqaluttuarisaanermi pisimasut assigiinngissutsillu pillugit oqaaseqaatiliussasut Aningaasaqarnermut ministereqarfiup naatsorsuutigaa.
Oqaaseqaat ukioq manna aasaanerani sulinngiffeqartoqalinnginnerani piareersimassaaq.
Tamatuma kingorna naalakkersuisut aamma danskit naalakkersuisuisa tjenestemandit soraarnerussutisiaata qanoq naligiissinneqarsinnaanera oqaluuserissavaat.
