Tjenestemandit soraarnerussutisiatigut tusindilinnik isertitaqarsinnaasut

Tjenestemanditut atorfeqarlutik suliffiit naggataavimmik qimakkakku – taamaalillutillu aamma suliunnaarlutik tjenestemanditut pensioneqaleruit atugarissaarluarsinnaavutit.

Taamaattoqassappalli nunarput qimakkusussinnaasariaqarpat.

Nunatsinnimi Danmarkimilu meeqqat atuarfianni ilinniartitsisut tjenestemanditut soraarnerussutisiaanni 10.000 koruunit assigiinngissutaapput.

Ilinniartitsisut Kattuffiata IMAK misissuinera tamanna takutinneqarpoq.

Danmarkimi tjenestemanditut soraarnerussutiisiat 2019-imiilli qulingiluariarluni qaffanneqarsimasut nalunaarusiamit takutinneqarpoq. Danmarkimi akit qaffakkiartornerat iluatigalugu tamanna pivoq. Nunatsinni tjenestemandit soraarnerussutisiaat 2018-imili qaffanneqarsimanngillat, naak suut tamarmik aamma maani akitsoraluartut.

Atugassarititaasut pitsaanerunerat orniginarnerutinneqartoq

Tamanna ajornartorsiutaasoq, IMAK-ip pisortaa, Elna Heilmann misissuinerup saqqummiunneqarnerani oqarpoq.

- Tassa piaartumik aaqqinneqartariaqarpoq. Ilaa nunatsinni aningaasarsiat tungaatigut assigiinngisitsineq taanna qangalili atorunnaarsinneqarnikuuvoq. Kisiannili uani takussutissinneqarpoq ersersinneqarlunilu naalagaaffeqatigiinnerup iluani suli annertoorujussuarmik assigiinngisitsinermik ingerlatseriaaseqartoqarpoq. Taannalu aamma akuersaaginnarsinnaanngilarput, taanna oqarpoq.

IMAK-ip naalagaaffeqatigiinni tamarmi assigiissaartumik aaqqiissuteqartoqarnissaa sulissutigaa, tassa Savalimmiuni, Danmarkimi nunatsinniluunniit najugaqaraluaraanni atugassarititaasut naliinnissaannik qulakkeerineq.

Soraarnerussutisiassalli qaffasinnerunerat kisiat pissutigalugu inuit nuuttanngitsut misissuinerup takutippaa. Danmarkimi inissamik tunineqarnissamut periarfissat peqqinnissamullu tunngasut pitsaanerusut nunatsinnit aallarartoqarneranut aamma pissutaapput.

Atorfimmi assersuutigalugu pisortatutut atuuffimmit tjenestemanditut soraarnerussutisiaqaruit qaammammut 16.000 koruuninik amerlanerusunik akissarsiaqarsinnaasutit misissuinermi naatsorsuinerit takutippaat.