Pitsaassutsimik qaffassaaniarneq inissaqartitsilluarnermut ajoqutaassaaq
Ilinniartummi ilinniakkatigut pikkorinnerulereersut aallunneqarnerannut tamanna takussutissaasoq Ataatsimiititaliap oqaatigaa:
- Ilinniartitaanerit pitsaassusiannik qaffassaaniarnermi qaffasissutsinik aalajangersimasunik angusaqarniareersut mattunneqaannarnerat ataatsimiititaliamit ernumanartoqartinneqarpoq. Inissaqarluartitsinissaq sumiippa? Ilinniartitaanermut Ataatsimiititaliap siulittaasua Vivian Motzfeldt, Siumumeersoq, Ataatsimiititaliaq sinnerlugu aperivoq.
Kultureqarnermut Ilinniartitaanermullu Ataatsimiititaliaq ulluunerani paaqqinnittarfinnut, ilinniarnertuunngorniarfinnut, Ilinniarfissuarmut Ilisimatusarfimmullu paasisassarsiorniarluni sapaatip akunnerata qaangiuttup ingerlanerani takuniaasaqattaarsimavoq.
Inuusuttuaqqat ineriartornissamik iluatsilluarnissamillu anguniagaqarusunnerannik isumaqataasut aqutsisullu pisariaqartitsinerpaanut pimoorussisut Ataatsimiititaliaq isumaqarpoq:
- Inuusuttuaqqat qaffasinnerusumik angusaqanngitsut qanoq iliussappat? Nunatsinni ilinniarfiit inunnik ilinniartitsiniarlutik inuiaqatigiinni akisussaaffeqarpat, inuillu ilinniarnissamut mattunnissaat akissaqartipparput? Vivian Motzfeldt ilaatigut aperivoq, apeqqutillu Naalakkersuisunut apuunneqarnisssaat ataatsimiititaliap sulissutiginiaraa oqaatigalugu.