Ilinniarfissuaq EVA-p naliliinerani angusinngitsoortoq

Ilinniarfissuarmi ilinniarnerup qaffasissussaa ajorluinnarluni appasippoq, nalunaarusiami nutaami tamanna ersersinneqarpoq. Aqutsisullu nalunaarusiami isornartorsiorneqarput.

Ilinniartitsisunngorniarfimmi Ilinniarfissuarmi pissutsit ajorluinnarput. Danmarkimi naliliisarfiup, EVA-p, nalunaarusiaani nutaami tamanna erserpoq.

Aqutsisut ilinniartitsisunngorlaallu isornartorsiorneqangaatsiarput.

Ilinniartitsisunngorlaat piginnaasakippallaarput

Ilinniartitsisunngorlaat naammanngitsumik piginnaasaqarnerat naliliinermi taakkartorneqarpoq. Meeqqat atuarfianni ilinniartitsisussatut piginnaasakippallaarnerarlugit ilaatigut nassuiaasoqarluni.

Aamma atuaruk Ilisimatusarfiup ilinniarnermut piumasaqaatit sukaterpaat

Ilinniarnerup qaffasisssusaa aamma isornartorsiorneqangaatsiarpoq.

- Oqaatsinut fagit ilaanni ilinniarnerup qaffasissusaa ajorluinnarluni appasinnguatsiartoq, naliliinermi assersuutitut atorneqarpoq.

Bachelorinngorniat inaarutaasumik allaaserisaat angusisimasut 15-it avataaneersunit naliliiffigineqarnerisa aamma takutippaa Ilinniarfissuarmi naammassisartut karakterii qaffasippallaartumik inissinneqartarunartut.

Avataaneersunit naliliinernit karakterit Ilinniarfissuarmi karaktererisartagaannit ataatsimut isigalugit appasinnerusut paasinarsivoq. Tassa qaffasissusermit qaffasinnerusumik karakteriliisoqartartoq. Tassami allaaserinnilluni misilitsinnerit affaat Danmarkimi ilinniartitsisunngorniarfinni misilitsissutaasimasuuppata angusisimasussaanngikkaluarput.

Allaaserisat arfineq-marluk karakterilernerannit marlunnit pingasunilluunniit appasinnerusunik karakterilerneqartussaagaluartut nalilerneqarput.

Ilinniarfissuarmi ilinniartitsisunngorniarnerup EVA-mit naliliiffigineqarnera uani atuarneqarsinnaavoq (qallunaatut)

Aqutsisut isornartorsiorneqarput

Ilinniartulli kisimik isornartorsiorneqanngillat. Aqutsisummi aamma ersarissumik isornartorsiorneqarput.

- Ilinniartitsisunngorniarfiup unammilligassaasa ilagaat aqutsisut amerlasuut perorsaasussaqqinnginnerat, naliliinermi allaqqasoqarpoq.

Aamma atuaruk Tine Pars: Ilinniartut piginnaasakippallaarput

Nalunaarusiami allaaserineqarpoq pilersaarusiorsinnaasunik aqutsisoqarnissaa amigaataasoq, ilinniarnerup ineriartornissaanut maligassiuisussanik, ilinniakkanillu tunngavilinnik aqutsisunik aamma amigaateqartoq, ilinniarnerup pitsaassusaanik qulakkeerisussanik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat