AKILIISINNAAJUNNAARNEQ GMM-p pilersaarutaa iluatsingitsoq
Ingerlatseqatigiiffiup ukiorpassuarni pisortarisimasaata Ole Christiansenip ingerlatseqatigiiffiup akiliisinnaajunnaarnissaa ukioq manna qinnutigaa, qinnuteqaallu taanna Nunatta Eqqartuussisuuneqarfiata pingasunngormat suliareqqippaa. Tassalu NunaMinerals akiliisinnaajunnaartutut nalunaarutigineqaqqippoq.
Akiliisinnaajunnaartutut juulip aallaqqaataani nalunaarutigineqaqqaarpoq.
Nunattali Eqqartuussisuuneqarfiata akiliisinnaajunnaarsitsinissaq kinguartippaa, NunaMineralsilu akiliisinnaajunnaarnissani pinngitsoortinniarlugu akiligassaqarfimminut isumaqatigiissuteqarnissaminut decembarip 20-ata tungaanut periarfissinneqarpoq.
Aamma atuaruk NunaMinerals akiliisinnaajunnaaqqittoq
Aamma atuaruk NunaMinerals naggammik periarfissinneqartoq
NunaMinerals nammineerluni nalunaartoq
NunaMineralsip isumaqatigiissuteqarsinnaanani akiliisinnaajunnaartariaqarlunilu nakkutilliisutut toqqarneqarsimasoq eqqartuussissuserisoq Britta Keldsen aqqutigalugu Nunatta Eqqartuussisuuneqarfianut nalunaarutigimmagu Ole Christiansenip qinnuteqaataa eqqartuussivimmit suliarineqaqqippoq.
Ole Christiansen suliamut tunngasumik KNR-imut oqaaseqarusunngilaq, akiliisinnaajunnaarnissamilli qinnuteqarsimalluni uppernarsarpaa. Aqutsisunut nutaanut tatiginninnginneq inuunerminilu ingerlariaqqinniarneq pissutigalugit taamaliorsimalluni siornatigut oqaatigaa.
Aamma atuaruk Pisortaasimasoq akiliisinnaajunnaarnermik nalunaaruteqartuusoq
Aamma atuaruk Ole NunaMineralsilu aaqqiagiinngitsut
Namminersorlutik Oqartussat piginneqataassutitik tuluit ingerlatseqatigiiffiutaannut Greenland Mining Managementimut, GMM-imut ukiakkut 2015-imi tunniuppaat. Ingerlatseqatigiiffik tulunnit pigineqarluni ingerlaqqinniassammat, GMM nutaatut ilusilersuinissamut pilersaarummik saqqummiussivoq, Namminersorlutik Oqartussanut taarsigassat 4,5 millionit koruunit ilaatigut akilerniarlugit.
Nunamineralsip aqutsisui oqaaseqartinniarlugit attaviginiarsarigaluarpagut sulili iluatsinnagu. Aqutsisulli Ole Christiansenimut sakkortuumik siornatigut isornartorsiorput.
Akiligassaqarfiit katillugit 40 millionit koruuninik pisassaqarput, eqqartuussissuserisutullu suliffeqarfiup Malling & Hansen Dammip nalillit tuniniassavai akiliisinnaajunnaartullu pigisaanik agguassissalluni.
PISUT EQIKKARLUGIT
Novembarip 16-iani 2017
NunaMinerals akiliisinnaajunnaartutut Nunatta Eqqartuussisuuneqarfianit kingumut nalunaarutigineqarpoq.
Juulip aallaqqaataa 2016
NunaMinerals akiliisinnaajunnaartutut Nunatta Eqqartuussisuuneqarfianit nalunaarutigineqarpoq. NunaMinerals ingerlatseqatigiiffiup ukiuni arlalinni pisortarisimasaanit Ole Christiansenimit akiliisinnaajunnaartutut nalunaarutigineqarpoq. Akiliisinnaajunnaarnerup kingunerisaanik millionilikkuutaanik pissaqartinneqarnini annaassavaa. KNR-ip paasissutissaatai naapertorlugit aningaasat 2 millionit koruunit sinnerlugit pineqarput. Ingerlatseqatigiiffiup aalajangiineq suliassanngorteqqippaa.
Aamma atuaruk Nunaminerals akiliisinnaajunnaartutut nalunaarutigineqartoq
Juunip 14-iani 2016
Akiliisinnaajunnaartoqarneranik nalunaarutiginninnerit marluk Pigisanik agguaassisarnermut eqqartuussivimmi suliarineqartussaagaluarput, ingerlatseqatigiiffilli piffissaq kingulleq annaanneqarpoq. Akiliisinnaajunnaartoqarneranik nalunaarutiginninnerit marluusut sulisunit ingerlatseqatigiiffimmit akiligassaqarfigineqartuneersuupput. Aningaasalli pissarsiarinissaat ingerlatseqatigiiffiup iluatsippaa, nalunaarutiginninnerillu marluusut pinngitsoortinneqarput Pigisanillu agguaassisarnermut eqqartuussivimmi ataatsimiinnissaq taamaatiinnarneqarluni.
Aamma atuaruk NunaMinerals annakkallartoq
Novembarip 26-ani 2015
Namminersorlutik Oqartussat NunaMineralsimik ukiorpassuarni piginneqataanertik taamaatippaat. Tuluit suliffeqarfiutaata Greenland Mining Managementip, GMM, Namminersorlutik Oqartussat NunaMineralsimut 4,5 millionit koruuninik taarsigassarsiarititaat aktianillu piginneqataassutaat tiguaat. NunaMineralsip annaanniarnissaanut pilersaarut GMM-ip saqqummiussaa Namminersorlutik Oqartussanit taamaalillutik akueraat.
Aamma atuaruk NunaMinerals nunanit allamiunit pigineqalerpoq
Maajip 15-iani 2015
NunaMineralsip Greenland Mining Managementillu, GMM oqaloqatigiinnerat ima ingerlalluartigaaq ingerlatseqatigiiffiup akiliisinnaajunnartutut nalunaarnini utertillugu. NunaMinerals tamatumunnga taarsiullugu akilersuinerminik unitsitsivoq.
Aamma atuaruk NunaMineralsip annaanneqarnera nuannaarutigaat
Apriilip 19-aini 2015
NunaMineralsimi siulersuisut sukumiisumik isumaliuteqareerlutik akiliisinnaajunnaartutut nalunaarput, ingerlatseqatigiiffiup annaanniarnissaanut aaqqiissutissamik nassaartoqarsinnaanngimmat.
Aamma atuaruk NunaMineralsip akiliisinnaajunaarnini pisortatigoortumik nalunaarutigaa
Februaarip 22-ani 2015
Ingerlatseqatigiiffik nalunaaruteqarluni allappoq aningaasatigut ajornartorsiortupilussuulluni. Ingerlatseqatigiiffiup ingerlaannarnissaanut aaqqiissutissamik attanneqarsinnaasumik nassaartoqarsinnaanera siulersuisut qularaat.
Aamma atuaruk NunaMinerals akiliisinnaajunnaaratarsinnaavoq
Februaarip aappaani 2015
NunaMinerals A/S-imi pisortaaneq, Ole Christiansen, atorfimminit soraarpoq.
Aamma atuaruk NunaMineralsip pisortaanera atorfimminit tunuarniuteqarpoq
Januaarip 29-ani 2015
Aatsitassarsiornermik suliffeqarfik ingerlanerliorluni matoqqajaasoq immikkut ittumik ataatsimeersuartitsivoq. Ingerlatseqatigiiffiup siunissaa ullormut oqaluuserineqarpoq.
Aamma atuaruk NunaMinerals A/S-ip siunissaa ullumi aalajangiiffigineqassaaq
