Ole NunaMineralsilu aaqqiagiinngitsut
NunaMineralsimi aqutsisut nutaat siusinnerusukkullu pisortaasimasup Ole Christiansenip akornanni pissutsit pitsaavallaanngillat.
Ingerlatsiviummi pisortarisimasaa Ole Christiansen akiliisinnaajunnaarluni nalunaarumalluni qinnuteqarpoq, aningaasarsiassani atorlugit suliffeqarfiup akiliisinnaajunnaartutut nalunaarutigineqarnissaa piumasaralugu.
Aamma atuaruk NunaMineralsip Ole Christianseni saassukkaa
Suliffeqarfiup akiliisinnaajunnaartutut nalunaarutigineqarneratigut aningaasarsiassani pissarsiarinissaat ilimagisinnaanngilaa, suliffimmillu piginnittut nutaat tatiginnginnamigit NunaMineralsip akiliisinnaajunnaartutut nalunaarutigineqarnissaa piumasaraa, nutaamillu aallartittoqarnissaanik kissaateqarluni. Atuagagdliutini ullumi saqqummersuni tamanna atuarneqarsinnaavoq:
Aamma atuaruk Nunamineralsimut 150.000 koruunit annaassavai
- Inuiaqatigiinnguani inuuvugut, pisiniarlungalu Brugsenimiinnerit tamaasa imaluunniit qimmimik aneerussinerit tamaasa akiligassaqarfinnik NunaMineralsimilu piginneqataasunik tamatigut naapitaqartarpunga. Tamarmillu suliffeqarfik qanoq ingerlanersoq apeqqutigisarpaat, naak susassaqarfigiunnaareeraluarlugu. Tamanna uannut attuumassuteqartuarpoq, isumaqarpunga matumani ingerlariaqqinnissanut inuttut nammineq periarfissakka aamma sunniivigineqartut, Ole Christiansen, Atuagagdliutinut oqarpoq.
Ole Christiansenip Tuluit suliffeqarfiannut Greenland Rare Earths Projectimut pisortaanullu Patrick Newmanimut tatiginninnginnini AG-mut oqaatigaa, NunaMineralsip aaqqissuuteqqqinneqarnissaa pillugu suliffeqarfik Greenland Mining Management Newmanip ilaatigut pilersippaa:
Patrick Newman, direktør GREP
- Tuluit siunertarerpiagaat qularutigisorujussuuakka, Ole Christiansen AG-mut oqarpoq.
NunaMineralsimiillu Ole Christiansen pillugu oqaaseqarnissamut aamma tunuarsimaartoqanngilaq. Soorlu tusagassiuutinut nalunaarummi ippassaq marlunngornermi oqartut:
- Ole Christiansenip aalajangernera tupaallaatigaarput, aningaasanimmi kanngusugani piumasaqarpoq akiligassaqarfiit aktiaatillillu ajuallaatigisinnaasaannik, siulersuisuni siulittaasoq Christopher J. Williams oqarpoq.
KNR-p Ole Christiansen ualeq manna oqaloqatigimmagu, suliaq pillugu oqaaseqarnissaminut kissaateqannginnini erseqqissaatigaa, suliaq suli ingerlammat oqaatigalugu.
