NunaMineralsip Ole Christianseni saassukkaa
Nunatsinni eqqartuussiviup NunaMinerals tallimanngormat akiliisinnaajunnaartutut nalunaarutigaa. Tamatumunnga tunngaviuvoq ingerlatsiviup pisortarisimasaata Ole Christiansenip akiliisinnaajunnaarluni nalunaarumalluni qinnuteqarsimanera.
Ataasinngornermi ingerlatsiviup aqutsisui nittartakkamikkut nalunaaruteqarput tupaallaatigigitsik Ole Christiansenip akiliisinnaajunnaarluni nalunaarumalluni qinnuteqarsimanera. Taamaaliornikkummi akiligassaqarfiit aktiaatillillu aningaasassamik tigunissaannut periarfissaarussinnaammata.
- Ole Christiansenip aalajangernera tupaallaatigaarput, aningaasanimmi kanngusugani piumasaqarpoq akiligassaqarfiit aktiaatillillu ajuallaatigisinnaasaannik, siulersuisuni siulittaasoq Christopher j. Williams oqarpoq.
Aamma atuaruk Nunaminerals akiliisinnaajunnaartutut nalunaarutigineqartoq
Ingerlatsiviup nalunaarutaani siulersuisuni siulittaasup pilersaarut nutaaq paasissutissiissutigaa, taanna malillugu akiligassaqarfinnit 50-it missaaniittunit katillutik 40 millioner koruuninik NunaMineralsinit pissaqartunit amerlanerpaat tapersersugaat.
Pilersaarummi pingaarnerpaavoq akiligassaqarfiit 120.000 koruunit ataallugu pissaqartut siulliullutik akilerneqassasut, akiligassaqarfiillu 120.000 koruunit sinnerlugit pissaqartut ukiut marluk ingerlanerini annertoqatigiinnik arfineq pingasoriarluni akilerneqassasut.
Aamma atuaruk Pisortaasimasoq akiliisinnaajunnaarnermik nalunaaruteqartuusoq
Siulersuisuni siulittaasoq naapertorlugu Ole Christiansenip pilersaarut taanna akiliisinnaajunnaarluni nalunaarumalluni qinnuteqarnermigut akornguseraa, taamaattumillu aqutsisut siunnersoqqullutik qinnuteqarsimapput Ole Christiansenimut illuatungaaniit piumasaqarsinnaanerlutik.
Ingerlatsiviup børsimi nalunaarsorneqarsimasup siulersuisuisa suli aalajaginngilaat eqqartuussiviup aalajagingaa ingerlateqqissanerlugu.
Tassunga tunngasumik Ole Christiansen oqaaseqartissinnaasimanngilarput.
