Nunaminerals akiliisinnaajunnaartutut nalunaarutigineqartoq
Ullumi tallimanngornermi juulip ulluisa aallaqqaataani NunaMinerals akiliisinnaajunnaarnera Kalaallit Nunaanni eqqartuussivimmit nalunaarutigineqartoq, eqqartuussissuserisup Poul Knudsenip, Advokatfirmaet Malling Hansen Damm-imeersup KNR-imut oqaatigaa.
- NunaMineralsi pillugu suliaq akiliisinnaajunnaartutut suliarineqassasoq eqqartuussiviup aalajangerpaa, Poul Knudsen KNR-imut oqarpoq.
Advokatfirmaet Malling Hansen Damm akiliisinnaajunnaartut pigisaannik nakkutiginnittutut eqqartuussivimmit toqqagaavoq, taamaammallu akiligassaqarfii tamaasa sinniisuuffigilerlugit.
Advokatfirmaet Malling Hansen Damm napertorlugu NunaMineralsip taassumalu eqartuusissuserisuata eqqartuussut ingerlateqqissanerlugu eqqarsaatigisusanngorpaat.
- NunaMineralsip eqqartuussut ingerlateqqissagaa kissaatigigunikku, tamanna ullualuit ingerlanerani pissasoq naatsorsuutigaara, Niels Hansen Damm, Advokatfirmaet Malling og Hansen Damm-imeersoq oqarpoq.
NunaMineralsimi pisortaasimasup Ole Christiansenip piginneqatigiiffiup akiliisinnaajunnaartutut nalunaarutigineqarnissaa qinnutigisimavaa.
Taassuma akiliisinnaajunnaarnerup kinguneranik millionit koruunit annaassavai. KNR-ip paasisai naapertorlugit to millionit sinneqarput.
- Uannut aningaasat pingaarnerunngillat. Innarligaannginnissarli pingaarneruvoq, Ole Christiansen KNR-imut oqarpoq.
Nunamineralsip eqqartuussissuserisua Paulsen Keldsen piginneqatigiiffianeersup, Britta Keldsenip, ippassaq oqaatigaa Nunamineralsip akiligassaqarfini isumaqatiginiarsimagaluarai pissatik piffissap sivisuup iluani tigusussanngorlugit.
Tamannali Ole Christiansenip piviusorsiorsorinngilaa.
- Imaassinnaavoq isumaqatigiissusiortoqarsinnaasoq. Aaliangiisorli tassaavoq piginneqatigiiffik akiliisinnaassuseqannginnera taamaammallu tigoriaannarnik aningaasaateqarnani. Aammami piginneqatigiiffiup ingerlannera miilionerpaalussuarnik akeqarpoq.