Pisortaasimasoq akiliisinnaajunnaarnermik nalunaaruteqartuusoq

Ingerlatseqatigiiffiup NunaMineralsip akiliisinnaajunnaartutut nalunaarutigineqarnera Eqqartuussisoqarfik Sermersuumi ippassaq sisamanngornermi suliarineqarpoq. NunaMineralsip eqqartuussissuserisuata Britta Keldsenip KNR-imut ilisimatitsissutigaa eqqartuussineq ullumi tallimanngornermut kinguartinneqartoq, eqqartuussisullu suliaq tassani isummerfigissaagaa.
NunaMineralsip eqqartuussissuserisua naapertorlugu Ole Christiansen akiliisinnaajunnaarnermik nalunaarutiginnittuuvoq Assi © : KNR
Allattoq Thomas Munk Veirum
juulip 01-at 2016 07:18
Nutserisoq Simon Uldum -

Britta Keldsen naapertorlugu ingerlatseqatigiiffiup akiliisinnaajunnaarneranik nalunaarutiginnittoq tassaavoq ingerlatseqatigiiffiup pisortarisimasaa Ole Christiansen.

Eqqartuussissuserisorli isumaqanngilaq akiliisinnaajunnaarneq Ole Christiansenimut iluaqutaassasoq:

- Ole Christiansen pisortaasimasutut akissarsialittut inissisimanngilaq, taamaammat piumasaqaateqarnissaminut immikkut pisinnaatitaanngilaq. Ingerlatseqatigiiffillu akiliisinnaajunnaartutut aqagu nalilerneqassappat koruuninnguamilluunniit pissarsinavianngilaq, Britta Keldsen taama oqarpoq.

NunaMineralsip akiliisinnaajunnaartutut nalunaarutigineqarnermi kinguartinneqarnissaa piumasarisimavaa, taamaaliornikkut  akiligassaqarfinnut tamanut pinngitsaaliinikkut akiligassaqarfinnik tulleriiaarisitsinissamik isumaqatigiinniarnissamut periarfissaqarumalluni. Taamatut isumaqatigiissuteqarneq akiligassaqarfiit tamarmik pissarsiassaasa piffissap sivisunerusup ingerlanerani utertinneqarnissaannik siunertaqarpoq.

Akiliisinnaajunnaarneq pillugu inatsit naapertorlugu immikkut illuinnartunik pisoqartillugu suliassanngortitsinerup kinguartikkallarnissaanut eqqartuussivik periarfissaqarpoq, taamatullu kinguartitsineq ullualuinnarnik sivisusseqakkajuttarluni.

Paasissutissat KNR-ip pissarsiarisimasai naapertorlugit, Ole Christiansen NunaMineralsimit akissarsiassatigut 2.718.000 koruunissaqartinneqarpoq. KNR-ip Ole Christiansen oqaaseqartinniaraluaramiuk iluatsissinnaasimanngilaa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk