Nunamineralsimut 150.000 koruunit annaassavai
Namminersorlutik Oqartussanut amerlanerpaanik aktiateqartunut tamanna suliassaalissaaq, Nunamineralsinut siunissami tatiginninneq attatiinnarneqassappat.
Aktiaatillimmi naammagittaallioraluttuinnarput. Aviisip Politikenip privatimik aningaasaliisimasoq oqaloqatigisimavaa, tassuma 150.000 koruunit annaariaannaavai, Nunamineralsip nammineq siunnersuutaa akunerineqassappat.
- Uannut aktianut aningaasaliissutit soorlu pokerinut lottonulluunniit assersuunneqarsinnaapput, taamaattumik aningaasat annaanissaat piareersimaffigaara. Naatsorsuutigaarali malittarisassat malinneqassasut, isumaqarpungali uani malittarisassat malinneqarsimanngitsut, Mette Marie Andersen Politikenimut oqarpoq.
Aamma atuaruk VIDEO NunaMineralsimi aqutsisut Kielsenimit sakkortuumik isornartorsiorneqartut
Taannatulli inuit allat 3.000-it Nunamineralsinut aningaasaliisimapput, allat annerpaamik aningaasaliisimasut tassaapput Nykredit aamma Lønmodtagernes Dyrtidsfond.
- Assigiinnarpaa naalagaaffimmut pigisanngortitsineq, tamannalu piginneqatigiiffimmut børsnoterikkamut Nunamineralsimuinnaangitsoq, aammali Kalaallit Nunaannut aatsitassasiornermut aningaasaliiffigissallugu nuannarineqartumut suujunnarsitsisinnaasoq, Marino Pietersen oqarpoq. Taassuma nutaarsiassaqartitsivik Goldletter International saqqummersittarpaa, Nunatsinnilu arlaleriarluni aatsitassarsiorneq pillugu ataatsimeersuartitsisarsimalluni.
Januaarip 29-ianni Nunaminerals ataatsimeersuassaaq attatiinnarnissaanullu amerlanerussuteqartariaqarpoq ilaasortat pingasunngorlugit avikkaanni marluk akuersisariaqarput.
