VIDEO NunaMineralsimi aqutsisut Kielsenimit sakkortuumik isornartorsiorneqartut
NunaMineralsip aatsitassanik ujalernermut aningaasartuutini 83 mio. kr.-it 0 kr.-inut nalikilliliivigalugit ataasinngormat nalunaarutigaa peqatigisaanillu suliffeqarfiup ingerlanerliornera pissutigalugu immikkut ittumik ataatsimeersuarnissamut aggersaalluni. NunaMinerals A/S-illu matusariaqarneranik ataatsimeersuarneq kinguneqaratarsinnaavoq.
- Siullermik oqaatigissavara Naalakkersuisut ukiarmi (novembarip qaammataani, aaqq.) NunaMinerals atortippaa 4,5 millioninik, taakkulu piumasaqaatitaqarput.
Taakkununngalu ilaapput ingerlatseqatigiiffimmut pilersaarusiornissaq anguniagaqassanillu aalajangersaanissaq.
Aamma atuaruk Nunaminerals nalikillileerujussuarnermigut ilungersunartorsiorluinnalersoq
- Qaammatip uuma naanerani aningaasat nungussimassappata, sooq taava pilersaarusiorsimassanngillat qanoq iliuuseqartoqarnissaanut.
- Pilersaarummik qaammatit marluk matuma siornatigut piumasaqaateqarpugut, taannalu ulloq manna tikillugu Nunamineralsimit apuunneqarnikuunngilaq, Kim Kielsen KNR-imut taama oqarpoq.
NunaMinerals A/S-ili matusariaqassappat tamanna naalakkersuisut siulittaasuata uggorissanerarpaa.
- Massakkut soorunami orniginanngikkaluarpoq selskabip taassuma matuneqarnissaa, kisianni aqutseriaaseq allanngortariaqassaaq ingerlaqqissappat. Tassani Namminersorlutik Oqartussat tassani piareersimapput arlaatigut iliuuseqaqataassallutik. Taamaattorli ingerlatseriaaseq massakkutuulli ingerlasinnaanngilaq.
- Qaammatit kingulliit marluk piumasaqaateqarfigineqarnikuupput: Pilersaarummik aggiussigitsi, taava taanna uagut nalilersussavarput, kisianni ulloq manna tikillugu takusaqanngilagut NunaMineralsiminngaanniit. Taaannalu ajuusaarnaqaaq, Kim Kielsen oqarpoq.
Aamma atuaruk NunaMinerals A/S-ip naakkittaatsumik tiguneqarnissaa Namminersorlutik Oqartussat ilumuunnginnerarpaat
Ataatsimeersuarnermi aalajangiiffigineqassaaq
Namminersorlutik Oqartussat ingerlatseqatigiiffimmut piginneqataassutaat 30 procentiupput. NunaMinerals A/S-imillu tamakkiisumik piginnittuulersinnaanermut ataatsimeersuarnermi qanoq aalajangertoqassanersoq apeqqutaassasoq Naalakkersuisut siulittaasuata oqaatigaa.
- Ataatasimeersuarnerm i taakkuusussaapput aalajangiisussat. Matutissinnaavaat imaluunniit allatigut iliuuseqartoqarsinnaavoq. Kisianni uagut periarfissanik allanik, NunaMineralsip aqqaluunniit ingerlaqqinnissaa arlaatigulluunniit allatut aqutseriaaseqarluni takorluuilluta taanna piareersimaffigisinnaavarput. Kisianni iliuuseqartoqartariaqarpoq, Kim Kielsen erseqqissaavoq.
