NunaMinerals A/S-ip naakkittaatsumik tiguneqarnissaa Namminersorlutik Oqartussat ilumuunnginnerarpaat

- Namminersorlutik Oqartussat NunaMinerals A/S-imik maanna oqaloqateqarneranut siunertaavoq, selskabip suliaasa ukiuni tulliuttuni ingerlanneqarnissaannut imminut akilersinnaasumik tunngaviliisoqarsinnaanersoq misissussallugu, Kim Kielsen oqaaseqaateqarluni taama allappoq.
 
Ilusilersueqqinniarluni suliaqarnerup pisariaqartinneqartumik piffissaqarfigineqarnissaa qulakkeerniarlugu Namminersorlutik Oqartussat NunaMineralsimut 4,5 millionit koruuninik taarsigassarsititsisimapput.
 
 Ingerlatseqatigiiffimmut namminersortut piginneqataasullu aningaasaliinerutinnissaannut periarfissaqarsimanngilaq. Ilanngullugu nunani tamalaani aatsitassarsiornermi aningaasarliortoqarnera ingerlatseqatigiiffiup ujaasilluni suliniutaanut sunniuteqarnerlussimasinnaavoq, Kim Kielsen allappoq nangillunilu:
 
- Tamanna tunngavigalugu NunaMinerals A/s piumaffigaarput selskabip nalinga arlaannut attuumassuteqanngitsumut nalilerteqqullugu. Aatsitassarsiorluni suliniutit nalingi ilumoortut aatsaat ilisimagaanni ingerlatsinissamut piviusorsiortumik pilersaarusiortoqarsinnaavoq selskabip ukiuni tulliuttuni ingerlannissaanut akileraartartut akiligaannik aningaasaliinissamut tunngaviusinnaasumik, Kim Kielsen oqarpoq, imalu naggasiivoq:
 
- Namminersorlutik Oqartussat ilusilersueqqinnermi aningaasaliisartunik namminersortunik suleqateqarusuppoq. Aappaatigulli aamma uppertikkuminartuunngilagut, akileraartartullu NunaMinerals A/S-ip ilusilersoqqinnissaanut akiliissappata tamanna piviusorsiortumik naatsorsoqqissaakkamillu tunngaveqarluni pissaaq.